Avilés lidera a les trés ciudaes en capacidá llingüística n'asturianu

Namái Xixón, la de mayor usu diglósicu, iguala nún de los cinco indicadores del estudiu ‘Conocimientu del asturianu nos ámbitos urbanos: Uviéu, Xixón y Avilés'.

A falta de conocer los datos completos del trabayu fechu por Francisco José Llera Ramo por encargu de l'Academia de la Llingua Asturiana, que s'espublizarán dientro d'un mes, según confirmó ayeri'l presidente de la institución, Xosé Antón González Riaño, l'avance de resultaos presentáu dexó una confirmación: los encuestaos n'Avilés amosaron mayor capacidá llingüística n'asturianu que los d'Uviéu y Xixón. Ye más, lideraron caúna de les pruebes entamaes nel cuestionariu llingüísticu.

Uviéu asítiase en segunda posición, mentes que Xixón rescampla por un mayor porcentaxe d'usu diglósicu, apunta l'estudiu. Les dos ciudaes altérnense siempre en tolos indicadores (fenómenos fónicos d'identificación visual d'oxetos n'asturianu, fenómenos léxicos d'identificación de conceptos n'asturianu, fenómenos léxicos d'identificación asturiana de significaos y fenómenos sintácticos de diferenciación de rexistros asturianu/castellanu) y namái nún, fenómenos morfolóxicos d'identificación de xiros n'asturianu, Avilés y Xixón rivalicen nos máximos en cuasi tolos xiros.

Mayor escolarización

"La razón tenemos que vela, pero hai dalgunes implicaciones que tenemos de contestu. Una ye que los niveles d'escolarización son mayores n'Avilés", apuntó Llera Ramo, qu'añadió que "si'l nivel d'escolarización ta dos o trés puntos perriba yá ye mui significativu", amás d'esistir un "mayor nivel de movilización, porque los que deciden escolarizar son los padres de los guaḥes".

Otru datu qu'esplicaría esti mayor aciertu nel cuestionariu llingüísicu ye que "Avilés ye más pequeñu y igual la cohesión social ye distinta", amás de la cercanía de la Estaya de la Llingua d'Avilés cola ciudadanía, l'entamu de más acontecimientos culturales que tienen que ver cola llingua y la movilización d'asociaciones y coleutivos, señaló Llera Ramo, ente otros. "Nun ye lo mesmo celebrar 'Carnaval' que celebrar Antroxu", dixo.

Na semeya, plaza Domingo Álvarez Acebal d'Avilés, qu'acueye a lo llargo del añu delles actividaes.