L'Angliru y el puertu La Cruz de Llinares decidirán La Vuelta 2023

La carrera ciclista respeta un añu más la toponimia tradicional, única oficial.

Asturies decidirá La Vuelta esta edición al programar la organización les habituales etapes asturianes na selmana última de la ronda. Van celebrase el miércoles 13 y el xueves 14 de setiembre, quedando per delantre namái trés xornaes p'aportar a Madrid.

L'Angliru, cume mítica del ciclismu mundial, torna esti añu a la carrera. El pelotón va salir de Ribeseya pa percorrer 122,6 quilómetros hasta Riosa xubiendo La Coḷḷadieḷḷa y l'Alto la Segá, pasos entrambos de primer categoría.

Col cansanciu nes piernes por esta dura xornada, los ciclistes van tener qu'afrontar un puertu nuevu en La Vuelta. Estrénase La Cruz de Llinares, asitiáu nel conceyu de Proaza, tamién de primer categoría, con unos primeros quilómetros mui duros con porcentaxes del 16 por cientu y una pendiente media del 8 por cientu en tola xuba, que se va facer dos vegaes.

La etapa va salir de La Puela pa percorrer 178,9 quilometros con pasu per La Veiga las Estacas (segunda categoría), San Ḷḷourienzu (primera) y Tenebréu (tercera) en direición a la parroquia de Llinares. Al finar la etapa, la caravana de La Vuelta va desplazase a La Bañeza, onde va salir la decimonovena etapa d'una carrera que va dar les sos primeres pedalaes el 26 d'agostu en Barcelona.

A la espera de la recuperación de los nomes de los altos

Como vien asocediendo nos años últimos, el llibru de ruta de La Vuelta emplega los topónimos tradicionales del país, únicos oficiales en 74 de los 78 conceyos. Ún de los pendientes ye Allande, lo qu'esplica qu'apaeza La Pola de Allande en llugar de La Puela al nun ser ésti entovía llegalizáu.

Tampoco nun usen los nomes tradicionales los puertos de la carrera, sacante L'Angliru, conocíu mundialmente pol so nome asturianu. Asina, por exemplu, emplégase 'Alto del Cordal' en cuenta de 'Alto la Segá' que recueye'l nomenclátor de l'Academia de la Llingua Asturiana al tar entovía pendiente la revisión toponímica de los accidentes xeográficos.

Nesi sen, en xunu constituyóse la Comisión Especializada de Toponimia Xeográfica que va trabayar nos años próximos nesta importante xera.

Na imaxe, perfil de la decimoctava etapa ente La Puela y el puertu La Cruz de Llinares. Gráficu propiedá de La Vuelta.