“El derechu a usar l'asturianu nun ta reconocíu nesta comunidá autónoma”, afirma la XDLA

El casu de Xicu Ilesies, el ciudadanu al que la xusticia nun-y dexa rexistrar llegalmente el so nome y apellíu na so forma asturiana, lleva a la Xunta pola Defensa de la Llingua Asturiana (XDLA) a recordar que’l “derechu a usar l'asturianu nun ta reconocíu nesta comunidá autónoma”. Reclama que se recueyan nos Presupuestos “polítiques clares a favor del asturianu y del gallego-asturianu”.

La organización llega a la conclusión d’esta falta de derechos pola situación d’Ilesies, pero tamién pola ausencia del idioma como llingua vehicular nes escueles o la non emisión de dibuxos animaos na TPA asina como d’informativos y retresmisiones deportives, y de conteníos específicos de música asturiana en RPA. “La XDLA quier recordar la responsabilidá que tienen les alministraciones públiques, pero tamién los grupos parllamentarios, en toes estes cuestiones, polo que ye urxente que dende los medios de comunicación públicos y dende'l sistema educativu se tomen midíes proactives a favor del usu de les nuestres llingües propies”, reclamen.

Por eso diríxense al “Gobiernu autonómicu y a toles formaciones polítiques con representación parllamentaria” pa que vean d’una vez a “la llingua y la cultura asturiana como un exe prioritariu pal futuru y entamen midíes proactives p'asegurar el so futuru. Estes van tener que vese nos Presupuestos autonómicos pal 2023”.

Los 100.000 euros pa RTPA

Sobre los propios Presupuestos, “a pesar de les palabres guapes hacia'l patrimoniu llingüísticu que vienen dende los dirixentes de la FSA-PSOE”, critica que “nun contemplen partíes pa fortalecer la Dirección Xeneral de Política Llingüística con más filólogos y traductores pa encarar les iniciatives normalizadores na Alministración pública, tanto nel so personal como nes sos campañes, publicaciones y webs”. Nesi sen, alerta de qu’esti departamentu “nun pue convertise nuna axencia de subcontratación al meyor postor onde se premien los proyectos más baratos perriba de la so calidá o repercusión”.

Insiste d’igual forma nel so refugu a los 100.000 euros que la Conseyería de Cultura, Política Llingüística y Turismu destina a la TPA pa la promoción del asturianu, ente que yá tien “27 millones d'euros de la Conseyería de Presidencia”, lo que considera que “ye dir contra l'Estatutu, la Llei d'Usu y la mesma llei de creación de RTPA, normes qu'establecen que los medios públicos tienen que ser una parte activa nel procesu de recuperación del patrimoniu llingüísticu del país”. Por eso reclama qu’esa partida se destine “a firmar un conveniu de collaboración con RTPA pa la creación d'un Serviciu Asturianu de Doblaxe y Traducción, destináu sobre manera a nutrir de dibuxos animaos a la canal pública y qu'estos productos valgan como apoyu a la enseñanza d'esti idioma”.

Na semeya, un momentu de la intervención na Xunta Xeneral d'Ana Cárcaba, conseyera de Facienda, el vienres pasáu pa presentar el Proyeutu de Llei de Presupuestos.