Quince empreses qu’usen l’asturianu participen nel Reguerada Fest, espaciu d’alcuentru de la cultura nel idioma

Candás va acoyer del xueves al domingu’l I Reguerada Fest, iniciativa del Gobiernu pa crear un espaciu d’alcuentru de la cultura en llingua asturiana. Van entamase más d’una docena d’actividaes estos cuatro díes y la Fábrica d’Ortiz va agospiar un Mercáu y Feria d’Empreses na que participen un total de quince firmes qu’empleguen l’asturianu.

“Carreño ye una zona mui vinculada a la cultura n’asturianu”, aseguró na presentación Antón García, direutor xeneral de Politica Llingüístca, Antón García, qu’apuntó qu’anque en Candás “suelen dicir que ye’l ñero de la lliteratura asturiana, yo creo que ye un poco más que’l ñero, ye l’aniciu, l’orixe de la lliteratura n’asturianu y paecíanos un bon sitiu pa rindir homenaxe a Antón de Marirreguera”, autor del autor del primer testu conserváu de la historia de les nueses lletres, el ‘Pleitu entre Oviedo y Mérida: Sobre la posesión de las cenizas de Santa Eulalia’, del 1639. Asina, escoyóse’l nome de Reguerada Fest pa esta iniciativa.

La organización cuerre a cargu del Gobiernu baxo la coordinación del escritor Xaime Martínez, y l’eventu cuenta cola collaboración del Conceyu de Carreño y el sofitu del Ministeriu de Cultura y Deporte. Del xueves al domingu van programase más d’una docena de convocatories gratuites y una feria onde van tar presentes 15 empreses y entidaes qu’usen la llingua asturiana nel so trabayu profesional.

Éstes son Acuto Xuegos, Al Otru Andar, Cerveza Cotoya, Cuatro Gotes, Díes Adulces, Ediciones Trabe, Espacio Nube, Música Asturiana, Puru Remangu, Pintar-Pintar Editorial, Ringo Rango, Tiza y Peonza, Nordés Móvil, Delallama y Mondo Manzana. “Ye puntu d’alcuentru ente cultura y empresa. Nestos últimos años observamos con munchu interés como munches empreses empiecen a utilizar la llingua asturiana bien nos productos que faen, bien en campañes, y pensamos que taría guapo xuntar nuna feria’l mundu de la empresa y el mundu de la cultura”, esplicó García.

La feria, dende’l vienres

Va abrir les sos puertes el vienres a les 16 hores, anque’l Regerada Fest va arrancar el xueves con programación infantil nos colexos San Félix y Poeta Antón, en concreto un taller d’escritura de poesía con María Esther García López y Aurelio González Ovies. Llueu van venir recitales lliterarios, talleres, charres, esposiciones y conciertos.

La ufierta musical va tar compuesta pola Orquesta Céltica Asturiana, Pop Piquiñín, Xosé Ambás y Ramsés Ilesies y L-R. Tamién va haber propuestes de fusión ente poesía y música electrónica.

Les artes escéniques van tener el so espaciu cola reinterpretación del teatru costumista de Pachín de Melás al cargu de la compañía Vibra y una revisión del monólogu tradicional por Carlos Alba, ente otres actividaes. Mentes, la esposición ‘Soi yo lleendo’, comisariada pola galería Dos Ajolotes, pon en rellación a dellos autores de lliteratura asturiana, al traviés de los sos testos, con artistes que trabayen inspirándose naquellos conteníos pa ofrecer la so interpretación personal dende l’arte.

Completen la programación meses redondes sobre l’actividá empresarial y l’usu de la llingua asturiana y charres que van tratar asuntos como les esperiencies de xestión y programación n’espacios rurales o la traducción a la llingua asturiana. Van facese amás talleres de baille tradicional, de llectura, de poesía y cómic pa tolos públicos.

“El productu asturianu, la marca Asturies, y l’anclaxe tamién cola llingua asturiana ye algo colo que la sociedá asturiana simpatiza, y lo que facemos ye aprovechar esa simpatía pa devolver a la sociedá col entamu d’esti tipu d’actividaes”, finó García.

Na semeya, Alain Fernández, xerente del Teatru Prendes; Martínez; García; l'alcaldesa Amelia Fernández López; y José Jesús Varela, conceyal de Cultura, Obres y Playas, na presentación del I Reguerada Fest celebrada esta mañana na Casa de Cultura.