Créase Seronda Moza porque “la xente más mozo bien ameritaba una xornada específica d’actividaes n’asturianu”

Una feria d’asociaciones y empreses, talleres y un conciertu de Llevólu’l Sumiciu componen Seronda Moza, actividá nueva creada pola Direición Xeneral de Política Llingüística que va desenvolvese esti sábadu de baldre en Llanera. “La xente más mozo bien ameritaba una xornada específica d’actividaes n’asturianu” rescampla Antón García.

Cola collaboración del Conceyu, va haber nel IES de Posada “un programa d’actividaes gratuites que se van desenvolver n’asturianu”, siguió’l direutor xeneral, qu’especificó que “nun fai falta saber asturianu pa participar nelles”. El formatu escoyíu ye asemeyáu al del Reguerada Fest celebráu a lo primero del mes en Candás, anque concentráu nuna sola xornada y empobináu a la xente con edaes comprendíes ente los 16 y 35 años.

Asina, les persones que s’averen al centru públicu van poder conocer l’actividá d’un piñu d’empreses y asociaciones qu’empleguen l’asturianu nel so día a día. Tamién van poder apuntase a talleres de baldre sobre asuntos tan variaos como la cocina, l’actividá física, la creación de complementos, la composición d’un rap o la ellaboración d’un cosplay al traviés del reciclaxe de dellos elementos, que van tener llugar pela mañana.

Pa participar nellos ye necesario inscribise previamente nel corréu electrónicu serondamoza@gmail.com o al traviés d'esti enllaz. No musical, yá de tarde, tamiém va entamase una sesión coral improvisada p’adaptar dos temes tradicionales n’asturianu y un conciertu de Llevólu’l Sumiciu, que va poner el ramu a una xornada que va principiar a les 11 hores y va finar a les 21.