Andrés Fernández merez el II Premiu Enriqueta González Rubín de narrativa moza por ‘1929’

Un rellatu ucrónicu entituláu ‘1929’ llevó la segunda edición del Premiu Enriqueta González Rubín de narrativa moza. El so autor ye Andrés Fernández Menéndez, que recién se convirtiera nel escritor más mozu n’escribir una novela con ‘1809: Cartes de la Revolución de Trubia’.

Estudiante d’Estudios Clásicos y Románicos na Universidá d’Uviéu, en ‘1929’ da continuidá a esti títulu. Describe una Asturies qu’a lo llargo del sieglu XIX taba baxo’l dominiu del Reinu Xuníu y que vive una revolución lliberadora a lo primero del sieglu XX.

“Escrita dende un enfoque interseccional, usa con aciertu les ferramientes narratives, manexando con oficiu les distintes perspectives temporales y definiendo bien a los distintos narradores”, rescampló’l xuráu del gallardón. Fernández Menéndez ye la segunda persona en llevar esti premiu, que cuenta con una recompensa de 3.000 euros, destináu a creadores menores de 31 años depués de Blanca Fernández por ‘No que cinca los seres de lleenda’.

Terceru de los Premios Lliterarios

L’Enriqueta González Rubín ye’l terceru de los siete Premios Lliterarios que convoca la Conseyería de Cultura, Política Llingüística y Turismu en fallase. El primeru, en xunetu, foi’l XIV Premiu Alfonso Iglesias de cómic, que ganó Guillermo Menéndez Quirós con ‘Ana María. La Llobera d’Asturies’, y selmanes depués comunicóse’l XXVIII Premiu Xuan María Acebal de poesía, que foi pa Marta Mori por ‘Los carreros del tiempu’.