Andrés Fernández escribe con 17 años la novela epistolar ‘1809: Cartes de la Revolución de Trubia’

|
Andrés Fernández

L’escritor morciniegu Andrés Fernández, agora de 18 años, ta acabante d’asoleyar la so primer obra, convirtiéndose nel novelista más mozu de la lliteratura asturiana. Ye ‘1809: Cartes de la Revolución de Trubia’, una novela epistolar ucrónica qu’esplora lo que pudo pasar na dómina de la invasión francesa, que presenta esti sábadu n’Uviéu.

“Asturies, 2009: Pasaron 200 años dende la ‘Revolución de Trubia’ de 1809, una revolución que cambió pa siempre la hestoria d’Asturies. La Universidá d’Uviéu, dientro de los programes del bicentenariu, asoleya una edición revisada y correxida de les cartes de los personaxes que tuvieron un papel destacáu naquellos fechos”, ye’l puntu de partida d’una novela na que Fernández, estudiante de Filoloxía Románica, emplega un asturianu del sieglu XIX. Cartes cruciaes de políticos, militares, eruditos y dalguna espía que permiten al llector conocer batalles, crisis y histories que conformen una realidá paralela que resulta atractiva y orixinal.

Radagast, editorial especializada en temátiques de fantasía, ciencia ficción y terror, espubliza esta obra, con portada de Xon de la Campa, que yá trabayara nel xuegu de rol ‘Depués d’Ochobre’, otra ucronía asoleyada pola mesma empresa. L’historiador Faustino Zapico encárgase del prólogu

Fernández, qu’escribió ‘1809. Cartes de la Revolución de Trubia’ con namái 17 años, va presentar esti trabayu mañana al meudía n’Uviéu, na Biblioteca La Granxa.

Contador Estadistiques