Quintana merez el III Premiu Enriqueta González Rubín de narrativa moza

‘La tráxica hestoria de cómo Abraham mató la música’ resultó escoyida obra merecedora del III Premiu Enriqueta González Rubín de narrativa moza, destináu a escritores menores de 31 años. La so autora ye Beatriz Quintana, ganadora de la edición última del Entaína a Escribir.

Ye un rellatu de terror construyíu a partir de la socesión d’una serie d’acontecimientos tráxicos en dellos llugares y époques de la historia coneutaos al traviés d’un elementu común. El xuráu del gallardón, únicu de los Premios Lliterarios con una recompensa menor, de 3.000 euros, valoró esta novela sobre les otres dos presentaes por “la orixinalidá del so argumentu y la narración áxil y bien estructurada qu’ufierta un viaxe temporal al traviés de la música clásica”.

Ésti tuvo formáu pola traductora y profesora Aymara González Montoto; l’escritor y profesor Gonzalo Llamedo Pandiella; la maestra Tamara Collar; l’autora Solinca Turbón; y Andrés Fernández Menéndez, ganador de la edición anterior del Enriqueta González Rubín con ‘1929’. Antón García, direutor xeneral d’Aición Cultural y Normalización Llingüística, actuó como presidente y Laura Marcos, filóloga adscrita al Serviciu de Planificación Llingüística, como secretaria.

Nacida en Riañu nel 1995, Quintana cursó’l grau de Llingües Modernes y les sos Lliteratures na Universidá d’Uviéu y trabaya como profesora de Secundaria. Tien espublizao na revista ‘Lliteratura’ de l’Academia de la Llingua Asturiana y xusto va un añu proclamóse ganadora del VII Entaína a Escribir, el concursu de microrrellatos improvisaos n'asturianu pa xente mozo qu'entamaron les direiciones xenerales de Política Llingüística y de Mocedá, Diversidá Sexual y Derechos LGTBI.

Queden el de traducciones y el de testos teatrales

L’Enriqueta González Rubín ye’l sestu de los ocho Premios Lliterarios convocaos pola viceconseyería de Cultura, Política Llingüística y Deporte en fallase. Enantes conocióse que’l XV Premiu Alfonso Iglesias de cómic foi pa Xon de la Campa por ‘Misteriu nel soterrañu’; el XIX Premiu Xuan María Acebal de poesía, pa Xosé Anxelu Gutiérrez Morán por ‘Les hores de lluz’, que tamién llevaría’l el XVI Premiu María Josefa Canellada de lliteratura infantil y xuvenil con ‘Contando colos deos’; el XXIX Premiu Máximo Fuertes Acevedo d’ensayu, pa Héctor Braga por ‘Nel cantu la memoria. Ensayu sobro l’asturianada tradicional’; y el XLIV Xosefa Xovellanos de novela, pa Xulio Vixil por ‘Miel amargo’.

Los únicos gallardones que queden por concedese son el III Premiu Florina Alías a la meyor traducción y el I Premiu Pachín de Melás de testos teatrales. Éstos son, xunto col Enriqueta González Rubín, los trés que se crearon esta llexislatura pasada.