Trés ganadores del Nel Amaro, ente los finalistes de la sesta edición del premiu de teatru

Kamante Teatro debuta como finalista del Premiu y Festival Nel Amaro de Teatru Profesional en Llingua Asturiana o Gallego-asturiano, onde pasaron el corte trés ganadores del gallardón. Son Carlos Alba, primeru en llevar esti concursu, Factoría Norte y Nun Tris, últimu en facelo.

El Teatru Filarmónica d’Uviéu va acoyer los vienres 7, 14, 21 y 28 d’ochobre la parte de festival del premiu. Los cuatro finalistes van representar énte’l xuráu, nuna función abierta al públicu, les obres presentaes pa escoyer cuála ye la merecedora del gallardón, que tien un recompensa de 6.000 euros.

El Nel Amaro convócase “cola mira de consolidar, arriquecer y prestixar estes dos llingües nel ámbitu del arte dramáticu” y nesta edición presentáronse cinco propuestes. D’elles convencieron pa pasar el corte ‘Les madreñes vacíes’, de Carlos Alba; ‘Aventurina, l’ablana’, de Factoría Norte; ‘La sierva patrona’, de Producciones Nun Tris; y ‘Con M mayúscula’, de Kamante.

Toos repiten nesta fase del concursu a esceición d’esta compañía última. Amás tienen l’honor de ganar en dalguna ocasión el Nel Amaro: Alba fíxolo nel 2017, na primer edición, con ‘Llázaro de Tormes’; Factoría Norte nel 2019 con ‘Les rellaciones peligroses’; y Nun Tris l’añu pasáu con ‘La reina la guapura de Leenane’.