Nun Tris lleva’l so primer Nel Amaro cola adaptación asturiana de 'La reina la guapura de Leenane'

|
Escena de 'La reina la guapura de Leenane' de Nun Tris

Llueu de ser finalista en dos ocasiones, Producciones Nun Tris llevó’l so primer Premiu y Festival Nel Amaro de Teatru Profesional en Llingua Asturiana o Gallego-asturiano. La obra ganadora de la quinta edición ye ‘La reina la guapura de Leenane’, versión asturiana de la creación del irlandés Martin McDonagh estrenada nel Xovellanos nel 2020.

El xuráu formáu pola actriz y filóloga María Cotiello; la escritora y filóloga Pilar Fernández; la filóloga y profesora Mar Friera; l’escritor y profesor Chechu García; y l’actriz y crítica teatral, Eva Vallines, col direutor xeneral de Política Llingüística, Antón García, y la filóloga adscrita a la direición xeneral, Laura Marcos, como secretaria, decidióse pola propuesta de Nun Tris por ser “un apueste pol teatru contemporaneu”. Nel acta rescamplen que “brilla en tolos aspectos: repartu, dirección, puesta n’escena, testu y traducción” y que enfrenta al públicu “con una problemática irlandesa d’emigración, conflictu llingüísticu y d’identidá que s’afaya mui bien a la nuestra tierra”.

Dirixida y llevada al asturianu por Antón Caamaño, ‘La reina la guapura de Leenane’ cuenta con un repartu conformáu por Izar Gayo (Maureen Folan), lnma Rodríguez (Mag Folan), Diego Lombardía (Ray Dooley) y Carlos Alba (Pato Dooley). Ye un drama sobre la soledá, la sinceridá y les rellaciones ente les persones y la familia.

Estrenóse nel 1996 y representóse pelos circuitos teatrales más importantes de Londres y New York. Cuenta con versiones en gallego, catalán y castellanu, y l’asturiana llevóse per primer vez a escena n’agostu del añu pasáu nel xixonés Teatru Xovellanos.

Los ganadores anteriores

Con esti reconocimientu Nun Tris incorpora’l so nome al de los ganadores d’un premiu que busca “consolidar, arriquecer y prestixar” l’asturianu y el gallego-asturiano “nel ámbitu del arte dramáticu” depués de ser finalista nel 2017 con ‘Los amorinos de Bastián y Bastiana’ y nel 2018 con 'Aire'. Carlos Alba 'Cellero' foi’l primeru en llevalu, nel 2017, con ‘Llázaro de Tormes’, mentes que les ediciones del 2018 y 2020 recibiólu Higiénico Papel Teatro con ‘Hansel y Gretel’ y ‘El viaxe de Covaletti’, siendo Factoría Norte el vencedor nel 2019 por ‘Les rellaciones peligroses’.

La llista de finalistes d’esti V Nel Amaro conformáronla El Callejón del Gato, con ‘Grana de cardamomu’; Factoría Norte, con ‘Les piripiripirates con parches y a lo xole’; y ‘Setiembre’, con José Rico Arte Producciones. La recompensa d’esta convocatoria ye de 6.000 euros.

Contador Estadistiques