El Gobiernu refuerza esti añu la conmemoración del 25 de mayu

“El próximu 25 de mayu conmemoraremos un día clave na historia d’Asturies: la declaración de la soberanía popular y la declaración de guerra al invasor Napoleón”, anunció ayeri’l presidente Adrián Barbón. El Gobiernu prepara pa la selmana d’esta xornada recreaciones históriques y conferencies sobre esta fecha clave na historia del país.

L’añu pasáu, per primer vegada, entamóse un actu institucional en conmemoración del 25 de mayu del 1808, xornada na que la Xunta Xeneral se declaró soberana, se llevantó n’armes fente al exércitu francés y unvió embaxadores a Inglaterra. D’esta forma finábase col escaecimientu d’esti fechu históricu que, pa muncha xente, debería ser motivu pa encaxar ehí’l Día d’Asturies en cuenta del 8 de setiembre, Día de la Santina, festividá d’orixe relixosu.

Nestos acontecimientos ta tamién l’orixe de la bandera actual d’Asturies, polo que Barbón define esta celebración como “el nuesu día de la bandera”. Ye nesta cuestión y na significación del 25-M no que se va centrar la programación d’esti añu, que l’añu pasáu quedó nun actu institucional conmemorativu nel Palaciu del Conde de Toreno.

Esti llugar, informa Europa Press, va acoyer el 25-M na mañana una actividá pa estudiantes de Secundaria con amuesa d'uniformes de la dómina y pela tarde, a les 17 hores, la mesa redonda ‘La significación histórico-política del 25 de mayu de 1808’, cola participación José María Fernández González, Ignacio Fernández Sarasola y Marta Friera, a lo que va siguir la intervención del presidente Barbón; el de la Xunta Xeneral, Marcelino Marcos; y el del alcalde d’Uviéu, Alfredo Canteli, y una representación histórica nel esterior por parte de l’Asociación de Recreación Histórico Cultural de Asturias. El sábadu 28 esti coleutivu tamién va protagonizar otra de los fechos acontecíos esi día nel 1808, va ponese una conferencia nueva y va facese un homenaxe frente a la placa que recuerda’l 25-M restituyida recién na cai Altamirano.

Na semeya, Barbón posa con persones carauterizaes nel actu institucional celebráu l'añu pasáu.