“La conmemoración del 25 de mayu intenta reparar un escaezu inxustu y enorme”, reconoz Barbón

El 25 de mayu del 2021, 213 años depués de la declaración de soberanía de la Xunta Xeneral, conviértese tamién nuna fecha importante al ser la primer ocasión en qu’esti momentu históricu clave na historia del país ye recordáu y puestu en valor poles nueses instituciones. “Esta conmemoración intenta reparar un escaezu inxustu y enorme”, reconoció'l presidente Adrián Barbón nel actu celebráu nel uvieín Palaciu del Conde de Toreno.

Josefina Velasco, archivera bibliotecaria de la Xunta Xeneral, encargóse d’abrilu rellatando los fechos acontecíos en mayu del 1808, a la que siguió Secundino Pereira, presidente de l’Asociación de Recreación Histórico Cultural de Asturias, creada nel 2004, que vien conmemorando dende’l 2007 xunto cola Asociación Amigos del País una “fecha crucial na historia contemporánea d’Asturies”. Participó vistíu con un uniforme del “Regimiento de milicias provincial de Oviedo”, única únida militar qu’había n’Asturies como fuercia militar de guarnición.

L’alcalde d’Uviéu, Alfredo Canteli, apuntó que “hai que sentise arguyosu de los nuesos meyores momentos como pueblu, y los fechos de mayu del 1808 ensin dulda sonlo”. Na so intervención llamó a dar “un pasu decidíu hacia la unidá y hacia’l compromisu pol futuru d’esta tierra pencima d’idees, de partíos y de banderes ideolóxiques”, aprovechando’l momentu pa pidir a Barbón collaboración pa dar solución a “asignatures pendientes” pal conceyu, citando la Fábrica de La Vega, la ronda norte y el Cristo.

Marcelino Marcos, presidente de la Xunta Xeneral, rescampló que la Xunta Suprema “nun foi una institución puramente militar, sinón política” qu’aquel 25 de mayu “alcordó asumir la soberanía y establecer l’orde políticu, xurídicu, económicu y social vixente que l’illexítimu Gobiernu francés frayara”. Ye la que “organizó tolo necesario pa la defensa del territoriu y bona alministración: la qu’unvió emisarios al Reinu Xuníu; la que declaró la paz con Suecia y Gran Bretaña; la que nomó un xeneral en xefe del Exércitu, el Marqués de Santa Cruz, y dellos tenientes xenerales y gobernadores militares; pero tamién la que creó los ministerios de Facienda, Gracia y Xusticia o Estáu y Guerra; la qu’asumió una xurisdicción que diba más allá de los límites territoriales del Principáu; y la que propición que per dalgún tiempu fora Asturies independiente del restu d’España”.

Poro, considera que “l’actual Xunta Xeneral del Principáu ye más heredera de la Xunta Suprema constituyida nel 1808 que de la Xunta Xeneral esistente con anterioridá a esa fecha” y aseguró que “ye de xusticia celebrar y conmemora esti 25 de mayu del 1808”, fecha “na que per primer vegada na Península Ibérica reconozse que’l pueblu ye soberanu; la primer vegada en toa España qu’un órganu oficial reconoz la soberanía popular, que ye la base de la democracia moderna; el día nel que naz el pensamientu y la práutica democrática moderna n’Asturies; el día nel que’l pueblu toma conciencia como pueblu en mayúscules; el día nel que dalgunos consideren qu’asocedió lo que sería la primer rebelión con soberanía popular”. Tamién citó la bandera, “inventada a partir del emblema diseñáu por Xovellanos nel 1808 y usada poles tropes de la Xunta Suprema na llucha contra los invasores napoleónicos”, que “yá se convirtió nel símbolu por antonomasia d’Asturies como comunidá autónoma".

"El nuestru particular día de la bandera"

Encargóse de poner el ramu al actu Barbón, qu’agradeció l’acompañamientu nel actu “pa falar del futuru d’Asturies. Porque esta mañana nun aconceyamos namái pa conmemorar un fitu na nuesa historia, sinón pa falar del nuesu porvenir”. Ente los presentes, la delegada del Gobiernu estatal n’Asturies, Delia Losa; el rector de la Universidá d’Uviéu, Ignacio Villaverde; y los voceros de los grupos parllamentarios de la Xunta Xeneral.

“A bon seguru, a estes altures toos nos fadremos la mesma entruga. Cómo consentimos l’escaezu d’aquellos díes, plenos de significáu históricu y políticu p’Asturies y España entera. En verdá, nun acierto a responder nin a esplicámelo”, aseguró, pa depués apuntar que “por contra, sí puedo esplicar el porqué d’esti actu. Esta conmemoración, que se repetirá tolos años como me comprometí cola sociedá asturiana, intenta, precisamente, reparar esi escaezu inxusto y enorme. Ye una celebración cola que cualquier asturianu o asturiana pue sentise identificáu ensin distinción d’ideoloxía o rangu”.

Darréu rescampló que “nesta conmemoración cabemos toos y toes. Cómo nun va a haber llugar pa toos nun actu que tamién recuerda los oríxenes de la nuesa bandera. Porque esti día, nun lo escaezáis, ye l’orixe de la nuesta bandera, la bandera d’Asturies. El 25 de mayu ye’l nuestru particular día de la bandera”.

Parte del discursu n’asturianu y gallego-asturiano

“Nun queremos atanos al pasáu, sinón ameyorar el conocimientu de la nuesa historia p’algamar el fututu con arguyu y confianza nes nueses fuercies, que son munches”, siguió’l presidente, momentu nel que camudó pal asturianu. “Enantes apelaba a la imaxinación. Vamos volver pensar nel 1808, cuando l’exércitu napoleónicu tovía s’espardía como una mancha d’aceite imparable per Europa. Tamién entós taba cambiando’l mundu. Coles revoluciones americana y francesa, col desenvolvimientu de la primer revolución industrial, la eternidá del antiguu réxime esvanecíase. Digo eternidá porque l’arquitectura social concebíase inmutable, más obra de Dios que de los homes”.

“Hemos figuranos esi fin d’un mundu, cuando tola sociedá conocida temblaba, y hemos recordar cómo respondió Asturies nos episodios de mayu: faciéndose ama del so destín con rebelión, enfotu y audacia, avanzando camín de la frontera nueva d’un mundu económicu, social y políticu nuevu. Agora encaramos tamién tresformaciones qu’inquieten, tan grandes qu’asusten. Vamos camín d’una revolución industrial del revés: ensin carbón, ensin fumu, ensin chimenees. Amás, tenemos que la encarar cuando tovía nun superemos los daños de la crisis sanitaria más grave del últimu sieglu. Una crisis sanitaria, por cierto, qu’Asturies encaró con entereza y fortaleza, la propia de la nuestra tierra” afirmó.

“Nun podemos aparar el reló, da-y l’altu al tiempu, pidi-y que nos conceda una tregua nel so tránsitu, qu’apare pa esperanos. Tampoco nun podíen facelo los homes y muyeres de 1808. Nin los que se llevantaron na Xunta Suprema nin los que, de xuru más por mieu que por convencimientu, defendíen acatar les órdenes de Murat. Por una razón bien cenciella: el tiempu del cambéu yera inevitable y, a pesar de toles resistencies, diba acabar imponiéndose”, dixo pa pasar darréu al gallego-asturiano. “Outra vez, Asturias precisa hoi rebelión, esfouto y audacia, fiúnza nas nosas propias forzas pra ganar outro cambeo inevitable, el da tresformación del noso paradigma industrial y económico, que namáis vai poder ser verde y dixital. Darye as costas é inútil; negallo, úa insensatez; convertillo núa oportunidá, un acerto”.

Yá en castellanu, fixo referencia al 40 aniversariu del Estatutu d’Autonomía y apuntó que “esta conmemoración ye más que una leición d’historia, más tamién que la reparación de un escaezu, más qu’un exerciciu d’arguyu. Esti actu ye una reivindicación d’autoestima, de confianza na capacidá d’Asturies pa construyir el so futuru”, pa finar afirmando que “güei, 213 años depués, Asturies ha volver a facese dueña del so destín”. L’himnu d’Asturies, interpretáu por Vicente Prado ‘El Pravianu’ a la gaita y por Eva Prado al tambor, punxo’l ramu a esti actu históricu.