Éstos son los actos institucionales pol 25-M

Van desendolcase esta xornada y el sábadu.

Llueu de celebrar per primer vegada l'añu pasáu un actu institucional pa conmemorar el 25 de mayu del 1808, xornada na que la Xunta Xeneral declara la so soberanía, el Gobiernu refuerza'l recuerdu d'esta fecha clave na historia del país. Asina, va entamar conferencies, actividaes pa escolares y recreaciones históriques n'Uviéu.

A les 11.30 hores nel salón d'actos del Palaciu de los Condes de Toreno va entamase 'El 25 de mayu del 1808 y la Guerra de la Independencia', una exhibición d'uniformes d'época a cargu de l'Asociación de Recreación Histórico-Cultural de Asturias (ARHCA) dirixida a estudiantes de Secundaria. Nel mesmu llugar, a les 17 hores, José María Fernández González, presidente de l'Asociación de Amigos del País de Asturias; Ignacio Fernández Sarasola, caderalgu de Derechu Constitucional de la Universidá d'Uviéu; y Marta Friera, profesora titular d'Historia del Derechu y de les Instituciones de la Universidá d'Uviéu, van participar na mesa redonda 'La significación histórico-política del 25 de mayu del 1808'.

Tres la mesma, a les 18 hores, l'alcalde d'Uviéu, Alfredo Canteli; el presidente de la Xunta Xeneral, Marcelino Marcos; y el presidente d'Asturies, Adrián Barbón, van protagonizar la clausura de la xornada. Darréu, a les 18.20 hores, ARCHA va facer una presentación d'armes con uniformes de la época na plaza Porlier.

Corones de lloréu y conferencia

Esti coleutivu y l'Asociación de Amigos del País de Asturias va entamar tamién dellos actos el meudía del sábadu incluyíes nel programa de la conmemoración institucional del 25-M. Una comitiva va salir de la plaza de la Casa Conceyu en direición a la Corrada l'Obispu, entrando primero nel claustru de la Catedral por la Puerta de la Llimosna. Na Sala Capitular de la Catedral va ponese la conferencia 'El estandarte de Pelayo: el 25 de mayo de 1808 y el alzamiento de Riego en la poesía inglesa' a cargu Agustín Coletes, caderalgu de la Universidá d'Uviéu.

Darréu va dexase una corona de lloréu baxo les plaques de los Centenarios I y II, pa siguir con salves na Corrada l'Obispu a cargu d'un pelotón de recreacionistes d'ARCHA n'honor a les persones que perdieron los vida na Guerra de la Independencia. Pa finar, va colocase una corona de lloréu énte les plaques conmemoratives del espolín del 9 de mayo del 1808 na cai Altamirano.