La Vuelta a Asturies espera a Valverde y Quintana na salida d'Uviéu

El pelotón de la LXIV Vuelta a Asturies-Julio Álvarez 'Mendo' va principiar a pedaliar el día 29 n’Uviéu nuna edición nueva de la carrera ciclista, que caltién les 3 etapes. Cola presencia confirmada de Simon Yates (BikeExchange-Jayco), la organización espera contar tamién con Alejandro Valverde (Movistar) y Nairo Quintana (Arkéa-Samsic).

El BikeExchange-Jayco y l'equipu español son los dos únicos UCI WorldTeam que van tomar parte na Vuelta a Asturies que, como novedá, va recuperar la final na uvieína cai Uría. L'australianu va tar lideráu pol corredor inglés, ganador de la Vuelta a España nel 2018, mentes que dende Movistar nun se descarta la inscripción de Valverde, qu’esti añu va colgar la bicicleta.

La so participación diba decidise según el so estáu de forma depués de correr la Flèche Wallonne, que se celebró güei, con un segundu puestu del murcianu y victoria del belga Dylan Teuns (Bahrain Victorious) nun final axustáu. Pela so parte, el vencedor de la Vuelta a Asturies l’añu pasáu, Quintana, ta pendiente de recuperar d’una cayida que la selmana pasada-y obligó a retirase del Tour de Turquía.

El tradicional L’Acebu

La primer etapa de la Vuelta a Asturies, qu’un añu más emplega una doble toponimia pa los puntos de salida y llegada, anque namái nel cartelu promocional, va partir d’Uviéu, del Centro Comercial Los Prados, y va tener final en La Pola Ḷḷena, con pasu per La Collaona y Carabanzo, puertu de tercera siempre decisivu pola so cercanía a meta. Mentes, el sábadu 30 el pelotón va arrancar en Candás camín de Cangas del Narcea, onde se va llegar tres xubir L’Acebu.

El domingu 1 la ruta va ser Cangas del Narcea-Uviéu, con El Violeo como última oportunidá p’asaltar la carrera na cai Uría.