García Cortina ye la novedá principal d’una Vuelta a Asturies que pierde a Quintana pola cayida en Turquía

|
Maillots Vuelta a Asturies 2022

Finalmente nin Alejandro Valverde nin Nairo Quintana van tar na salida d’Uviéu d’esti vienres de la LXIV Vuelta a Asturies-Julio Álvarez 'Mendo'. Movistar va acudir finalmente col xixonés Iván García Cortina, el meyor corredor asturianu d’anguaño y mayor reclamu de la carrera xunto con Simon Yates (BikeExchange-Jayco), y el colombianu Iván Sosa.

El ganador de la Vuelta a España nel 2018 escoyó la Vuelta a Asturies pa preparar el Giro, que va arrancar n’Hungría la selmana siguiente, y conviértese nel gran favoritu énte l’ausencia del murcianu y el colombianu, últimu ganador de la carrera asturiana. Quintana nun pudo recuperar a tiempu d’una cayida que-y obligó a retirase del Tour de Turquía, polo que nun va poder defender el dorsal númberu 1.

Mentes, Valverde, que tamién va correr n’Italia, opta por descansar pa llegar n’estáu óptimu a la primera de les trés grandes vueltes. Va liderar Movistar n’Asturies Sosa, tamién convocáu pal Giro, col acompañamientu de García Cortina, que debuta na carrera ciclista asturiana.

Otros ciclistes asturianos que van tar na salida son Dani Navarro y Pelayo Sánchez (Burgos-BH), Eduardo Pérez Landaluce (Manuela Fundación) y Mauro Rato (BAI-Sicasal-Petro de Luanda).

D’Uviéu a La Pola

La primer etapa de la Vuelta a Asturies, de 166 quilómetros, va salir a les 12.45 hores del Centro Comercial Los Prados, n’Uviéu, col quilómetru 0 puestu en Llugones. El pelotón va pasar per Posada, Robleo (tercer categoría), La Estación, Noreña y El Berrón pa xubir La Gargantada (tercer categoría) en direición a La Felguera y continuar per Sama, L’Entregu, Blimea y La Pola Llaviana, pasar La Collaona (primera categoría) y baxar a Santa Cruz y Figareo hasta La Cabana.

Llueu d’aportar a Mieres y dar la vuelta a Figareo per Fresneo (tercer categoría), los ciclistes van xirar hacia l’Altu de Carabanzo (tercer categoría), yá mui cerca de la meta, en La Pola Ḷḷena. Un puertu curtiu pero que siempre da emoción a la etapa.

El sábadu la salida va tar en Candás y la llegada en Cangas del Narcea, onde se va llegar tres xubir L’Acebu, mentes que’l domingu la ruta va ser Cangas del Narcea-Uviéu, con El Violeo como última oportunidá p’asaltar la carrera na cai Uría.

En direuto per TPA

Los finales d’etapa d’esta edición de la carrera ciclista asturiana van ser televisaos en direuto per TPA, mentes que Teledeporte va dar un resume ampliu tolos díes. L'autonómica va coneutar mañana a les 15.58, con llegada a la plaza Alfonso X El Sabiu de La Pola a les 16.57 hores nel meyor horariu previstu.

Na imaxe, maillots de la xeneral, montes, metes volantes y regularidá d'esta edición.

Contador Estadistiques