El cartelu del ministeriu pal Día del Llibru edítase per segundu añu con versión n’asturianu

El día 23 celébrase’l Día del Llibru del Derechu d’Autor y, como ye vezu, el Ministeriu de Cultura y Deporte entama delles actividaes, ente elles la espublización d’un cartelu conmemorativu. Per segundu añu ésti tien versión n’asturianu y nel restu de llingües del Estáu, oficiales o non.

Elena Odriozola, ganadora del Premio Nacional de Ilustración 2015, ye la responsable del diseñu del mesmu, qu’incorpora un testu de Cristina Peri Rossi, última gallardonada col Premio de Literatura en Lengua Castellana Miguel de Cervantes. La so presentación ayeri abrió la programación especial del ministeriu por esta conmemoración y inauguró Semana Cervantina.

El cartelu ta disponible en castellanu, aragonés, catalán, eusquera, gallegu, occitanu (aranés) y valencianu. La versión en "bable" úfrese tamién como "leonés" –l’enllaz de los dos epígrafes conduz a una mesma páxina de descarga– al tener en cuenta’l ministeriu’l nome específicu pal idioma recoyíu nos respeutivos estatutos d’autonomía d’Asturies y de Castilla y Lleón.