Amplíense los aforos n'eventos deportivos al 85 y al 75 por cientu

Estos porcentaxes van tar vixentes lo que queda de mes de febreru. El miércoles rexistráronse 809 casos nuevos y el xueves, 793.

Los eventos deportivos profesionales van poder acoyer el 85 por cientu del aforu, nel casu d'instalaciones al aire llibre, y del 75 por cientu en pabellones. Hasta'l momentu permitíase un 75 y un 50 por cientu, de manera respeutiva.

La midida va entrar a valir mañana y va tar vixente tou febreru, cola intención de qu'en marzu, en casu de siguir la evolución descendente d'esta quinta fola, nun haya restricciones d'aforu. L'usu de la mázcara sigue siendo obligatoriu.

Per debaxo del millar de contaxos

La curva de la pandemia sigue en baxada, con 809 positivos detectaos el miércoles y 793, el xueves. La media diaria rexistrada la selmana pasada asitióse en 1.174.

Si'l martes había 331 hospitalizaos, el miércoles esta cantidá baxó a 301 y ayeri medró hasta 311. Hai en planta 284 pacientes y na UCI, 27.

No que respeuta a les muertes, hai que llamentar 6 nestos díes: 4 el miércoles de 2 homes de 99 y 71 años y de 2 muyeres de 93 y 85, y 1 muyer de 93 y un home de 82, ayeri. No que va d'andanciu finaron cola enfermedá causada pol coronavirus SARS-COV-2 un total de 2.364 persones.

Na imaxe, la vocera del Executivu, Melania Álvarez García, na rueda de prensa posterior al Conseyu de Gobiernu que determinó l'ampliación de los aforos. Semeya obra d'Armando Álvarez.