Preséntase 'La curuxa Catuxa' n'Uviéu Abierto

Adelántase l'horariu habitual d'esti ciclu na Biblioteca d'Asturies Ramón Pérez de Ayala al tar empobináu a un públicu infantil.

Vero Suari y Inaciu Galán, ganadores del XIII Premiu María Josefa Canellada de lliteratura infantil y xuvenil con 'La curuxa Catuxa', presenten esta tarde la edición d'esti cuentu, del que s'encargó Impronta con ilustraciones de Raquel Lagartos. L'actor Pedro Durán va conducir l'actu, que va principiar a les 17.30 hores, con entrada llibre, y tien confirmada la so asistencia Antón García, direutor xeneral de Política Llingüística.

Los llibros que llevaron los Premios Lliterarios 2020 protagonicen les primeres actividaes d'Uviéu Abierto, ciclu de creación nueva centráu na llingua y cultura asturiana qu'entama la Conseyería de Cultura, Política Llingüística y Turismu esti febreru y marzu na biblioteca d'El Fontán. El xueves viniente va ser el turnu de Sidoro Villa, que va dar a conocer ‘El fervinchu’, tamién editáu por Impronta, a les 19.30 hores.