Blanca Fernández conviértese na primer ganadora del Premiu Enriqueta González Rubín de narrativa moza

‘No que cinca los seres de lleenda’ ye la obra que va pasar a la historia como la primer merecedora del Premiu Enriqueta González Rubín de narrativa moza, gallardón creáu esti añu pola Conseyería de Cultura, Política Llingüística y Turismu. La so autora ye Blanca Fernández, novelista actual más xoven de les nueses lletres.

Destináu a persones menores de 31 años, y con una recompensa de 3.000 euros y la espublización del trabayu, el primer Enriqueta González Rubín ye pa esta yerbata del 1994 que l’añu pasáu espublizó ‘L’homes les caparines’ (Radagast) y que tien pendiente d’asoleyar 'Trovadoresca', col que ganó’l I Premiu Radagast de Novela Fantástica. El xuráu refirióse a ‘No que cinca a los seres de lleenda’ como un testu de “temática clásica, que pon en relación la tradición mitolóxica asturiana cola historia personal a partir de la idea de qu'esa mitoloxía vive en nós y s’espeya nes relaciones familiares, calteniéndose na tresmisión xeneracional”, lo que permite a Fernández “ufiertar una visión distinta de la lliteratura y la música populares, de los paisaxes y paisanaxes que nos envuelven, abriendo un camín novedosu dientro de la narrativa asturiana actual”.

Antón García, direutor de Política Llingüística, presidió la xunta d’esti grupu d’espertos conformáu poles escritores María García y Solinca Turbón, los escritores y profesores Xuan Fernandi y Gonzalo Llamedo, y la traductora y profesora Aymara González Montoto, con Lourdes Álvarez, filóloga del serviciu de la Direición Xeneral de Política Llingüística, como secretaria. Con esti fallu complétase’l sestu de los siete Premios Lliterarios, pendiente de conocese’l ganador del tamién nuevu Florina Alías de traducción.

Los merecedores de los restantes son Ángel de la Calle, con ‘Paez que nun foi ayeri’ (XIII Premiu Alfonso Iglesias de cómic); Pablo Texón, con ‘Cantar de ti mesma’ (XXIV Premiu Xuan María Acebal de poesía); Ramón d’Andrés, con ‘Una ciencia ensin enfotu’ (XXVII Premiu Máximo Fuertes Acevedo d'ensayu); José Ángel Gayol, con 'La cafiante muerte de Nicolai Bostov' (XLII Premiu Xosefa Xovellanos de novela); y Xilberto Llano, con ‘Boliescritu de primavera’ (XIV Premiu María Josefa Canellada de lliteratura infantil y xuvenil).