Blanca Fernández repite nos Premios Lliterarios, agora col María Josefa Canellada de lliteratura infantil y xuvenil

Una novela p’adolescentes, ‘El cartafueyu d’Alquimia’, lleva’l XV Premiu María Josefa Canellada de lliteratura infantil y xuvenil. La so autora ye Blanca Fernández, que suma asina’l so segundu reconocimientu siguíu nos Premios Lliterarios depués de ganar l’añu pasáu’l I Premiu Enriqueta González Rubín de narrativa moza.

La obra ganadora describe les rellaciones familiares de dos hermanos que nun conocen quién foi so madre. L’acta del xuráu rescampla de la mesma el “retratu de los personaxes y la evolución que siguen a lo llargo de la obra”.

Ésti tuvo conformáu por Gerardo Fabián Fernández, alcalde de Cabranes, onde se celebró l’aconceyamientu; Xilberto Llano, ganador de la edición anterior con ‘Boliescritu de primavera’; Alba Carballo; Mónica Rodríguez; Juncal García Velasco; y Alonso Zamora, fíu de l’autora que da nome al premiu, con Antón García, direutor xeneral de Política Llingüística, na función de presidente. Once trabayos presentáronse a esta edición, que caltenía una recompensa de 6.000 euros, decidiéndose finalmente por ‘El cartafueyu d’Alquimia’.

Nacida en Bimenes nel 1994, Fernández ye graduada n’Estudios Clásicos y Románicos y exerce como docente nel IES de Tinéu, trabayu que compaxina cola escritura. Tien espublizaes les noveles ‘L’home les caparines’ y ‘Trovadoresca’ (I Premiu Radagast de Novela Fantástica, Ciencia Ficción y Terror pa xente mozo), y l’añu pasáu ganó’l I Premiu Enriqueta González Rubín de narrativa moza, destináu pa escritores menores de 31 años, con ‘No que cinca los seres de lleenda’, pendiente d’asoleyase.

Queda por conocer el de traducción

El María Josefa Canellada ye’l sestu de los siete Premios Lliterarios en fallase, quedando namái por conocer el II Premiu Florina Alías a la meyor traducción. El primeru, en xunetu, foi’l XIV Premiu Alfonso Iglesias de cómic, que ganó Guillermo Menéndez Quirós con ‘Ana María. La Llobera d’Asturies’, y selmanes depués comunicóse’l XXVIII Premiu Xuan María Acebal de poesía, que foi pa Marta Mori por ‘Los carreros del tiempu’, mentes qu’esti mes diose a conocer el II Premiu Enriqueta González Rubín de narrativa moza, que foi p’Andrés Fernández Menéndez por ‘1929’; el el XVIII Premiu Máximo Fuertes Acevedo d'ensayu, que recibió Damián Barreiro por ‘Asturianía kitsch: decálogu de la cultura pop ástur’; y el XLIII Premiu Xosefa Xovellanos de novela, por ‘El viaxe del cacique’, autoría de Gonzalo González Barreñada.