La pandemia caltién la tendencia de baxada de positivos: 133 diarios de media la selmana última

El llunes rexistróse la cifra de 46 contaxos.

Sigue la tendencia descendente nesta cuarta fola de la pandemia. La selmana pasada entamó con 68.324 casos confirmaos de COVID-19 y finó con 69.255 llueu d'una revisión de los datos, lo que supón 931 positivos polos 1.359 de l'anterior.

Ello significa una media diaria de 133 contaxos, cuando hai un mes Asturies raspiaba'l mediu millar. La evolución d'esti datu dende l'entamu d'esta fola ye la siguiente: 51, 57, 196, 448, 493, 423, 289 y 194, hasta los 133 actuales.

Mentes, la incidencia acumulada a 14 díes yera'l domingu de 224,97 casos cada 100.000 habitantes. Trátase de la cifra más baxa del Estáu, siendo la media estatal de 415,19.

3 finaos na ponte

Na fin de selmana contabilizáronse 296 casos, polos 551 de l'anterior: 136 el vienres, 102 el sábadu y 58 el domingu. A ellos hai que sumar los 46 detectaos ayeri, lo que pon el total, a falta de la espublización de los datos oficiales de la COVID-19, en 69.301.

La tasa de positividá del últimu día quedó nel 5,5 por cientu llueu de la realización de 1.527 pruebes de diagnósticu d'infeición activa. A 7 díes esti porcentaxe yera'l domingu del 8,34 por cientu –ayeri baxó al 8,30 por cientu–, cuando'l xueves taba nel 9,51 por cientu.

Hebo que llamentar 3 finaos estes xornaes: la d'una muyer de 85 años el sábadu, la d'un home de 77 el domingu y la d'otra muyer de 54 ayeri. Súmense yá 2.039 muertes llueu d'una revisión de los datos, yá qu'hasta'l xueves contabilizábense 2.026.

95 pacientes tán hospitalizaos con confirmación o sospecha de COVID-19, 11 más que'l xueves, a los qu'hai que sumar 28 ingresaos na UCI, 3 menos.

Na semeya, viales de la vacuna de Moderna llegaos a Asturies la selmana pasada pa la so alministración.