Ayer entra en 4+, pero nun va tener llende d'axuntamientos

Sí sigue vixente en Carreño, Xixón, Gozón y Villaviciosa. Esti martes rexistráronse 92 casos nuevos y hebo que llamentar un fináu.

Na medianueche Ayer va entrar en nivel d'alerta 4+, al contar el llunes con una incidencia acumulada a 14 díes de 470,57 casos cada 100.000 habitantes. El causante d'esta alta incidencia ye un biltu yá conocíu y controláu, polo que les autoridaes sanitaries nun ven necesario pidir el preste del Tribunal Superior de Xusticia d'Asturies (TSXA) pa llendar los axuntamientos n'espacios esteriores de non convivientes a 10 perones, como asocede nos otros cuatro conceyos en riesgu estremu.

A falta de la espublización de los datos oficiales de la COVID-19, la Conseyería de Salú comunicó la detección ayeri de 92 casos nuevos –l'actualización aumentó esta cantidá en 4 por caso non contabilizaos en díes previos–. Son el doble que'l llunes, anque con una tasa de positividá diaria asemeyada.

Fixéronse 2.061 pruebes de diagnósticu d'infeición activa, polo qu'esti porcentaxe s'asitió nel 5,92 por cientu, cuando la xornada previa foi del 5,5 por cientu. A 7 díes taba enantes de l'actualización nel 9,51 por cientu –ayeri baxó al 7,83 por cientu–.

Finó un home de 61 años cola enfermedá causada pol coronavirus SARS-CoV-2. Ye la númberu 2.040 de la pandemia –una revisión de los datos suma 2 muertes más non contabilizaes qu'aumenta la cifra a 2.042–.

87 pacientes tán hospitalizaos con confirmación o sospecha de COVID-19, a los qu'hai que sumar otros 25 que tán na UCI. Son 8 y 3 menos que'l llunes, de manera respeutiva.

Na imaxe, Pozu San Antonio de Morea. Semeya baxo llicencia CC BY-SA 4.0.