L'ociu nocherniegu reabre l'interior y amplía horariu hasta les 3

Dende esti martes, cuando tamién va permitise la venta d'alchol a partir de les 22 hores en comercios. La selmana pasada rexistróse una media de 42 casos diarios.

L'ameyoramientu de los datos nesta cuarta pandemia lleva al Gobiernu a rebaxar les restricciones no tocante al ociu nocherniegu. Los chigres van poder reabrir l'interior de los chigres y trabayar hasta les 3 hores, mentes que pal restu de la hostelería l'horariu de pieslle va siguir siendo la 1, y tiendes y gasolineres van poder vender alcohol de 22 a 6 hores.

El 13 de xunetu activáronse les restricciones qu'esta medianueche finen llueu de trés prórrogues. Activáronse con una incidencia acumulada a 14 díes de 527,2 casos cada 100.000 habitantes, mentes qu'ayeri, na actualización última, yera de 70,28.

Na selmana última rexistráronse 296 contaxos, polos 420 y los 541 de les dos anteriores. Supón una media diaria de 42, confirmando asina la tendencia descendente.

Nesta cuarta fola, la evolución d'esti datu foi la siguiente: 51 (la selmana del 14 al 20 de xunu), 57, 196, 448, 493, 423, 289, 194, 133, 77 y 60, hasta los 42 actuales.

85 contaxos esta fin de selmana

Nos díes últimos rexistráronse 85 casos nuevos de COVID-19: 37 el vienres, 24 el sábadu y 24 tamién ayeri. Hebo que llamentar una muerte, el sábadu, d'un home de 84 años, la 2.058 del andanciu.

La tasa d'incidencia a 7 díes ye nestos momentos, depués de l'actualización última, del 3,22 por cientu. Tán ingresaos con confirmación o sospecha de COVID-19 62 persones, a los qu'hai que sumar otres 21 que tán na UCI, 6 y 1 más que'l xueves, de manera respeutiva.