Los autores de les obres que representen “la escelencia de la nuesa cultura” recibieron el so reconocimientu

Vero Suari y Inaciu Galán, Sidoro Villa, Alejandro Fernández-Osorio, Xune Elipe, Alberto Vázquez García, y Laura Iglesia y Carlos Dávila, d’Higiénico Papel Teatro, recibieron la escultura de los Premios Lliterarios y Artísticos 2020. Antón García emponderó les obres ganadores, que representen “la escelencia de la nuesa cultura”.

La gala d’entrega de los Premios Lliterarios y Artísticos 2020 treslladóse a Xixón nesta ocasión. Foi na Sala Chill-out del xixonés LLABoral Centru d’Arte y Creación Industrial, nun eventu retrasáu meses pola pandemia, con aforu reducíu y asistencia namái por invitación pola situación sanitaria, nel que s’ausentó la conseyera de Cultura, Política Llingüística y Turismu, Berta Piñán, pola visita a Asturies del secretariu d'Estáu de Turismu, Fernando Valdés, tresllandando’l direutor de Política Llingüística a los gallardonaos la so disculpa por nun poder asistir.

Aida Castañón y José Ramón Oliva encargáronse de la presentación y entrega de les escultures de les seis estayes de los premios. Los primeros en recibiles foron Suari y Galán, coautores de ‘La curuxa Catuxa’, obra merecedora del XIII Premiu María Josefa Canellada de lliteratura infantil y xuvenil.

Nos agradecimientos Suari tuvo pallabres pa la so familia por permiti-y crecer “queriendo y valorando esta llingua”. Pela so parte, Galán tamién se refirió “a los que trabayen nesta llingua” y deseó que n’ediciones próximes “estos premios se celebren nun contestu d’oficialidá”.

Villa, ganador del gallardón más veteranu, el XLI Premiu Xosefa Xovellanos de novela, por 'El fervinchu', recordó nun discursu con carga lliteraria la so trayeutoria, entamada con obres infantiles y coronada con 50 años, “afaláu por persones cercanes y delles botelles de sidra”, con noveles mui esitoses pa un públicu adultu qu’abrió ‘A estaya’. “Salú y llarga vida a la lliteratura y cultura asturiana”, finó la so intervención.

Recuerdu pa Xosé Bolado

La estaya de poesía, el XXVI Xuan María Acebal, foi pa ‘Tayu’ de Fernández-Osorio, que quixo “recordar y facer homenaxe a Xosé Bolado”, escritor y estudiosu de la lliteratura fináu’l mes pasáu. “Toi equí gracies a él”, confesó, yá que nún de los sos alcuentros en Madrid, al falar d’una idea, dixo-y “esto tienes que contalo y tienes que contalo n’asturianu. Y esto ye ‘Tayu’”.

El discursu más estensu y con conteníu foi’l d’Elipe, ganador del XXVI Premiu Máximo Fuertes Acevedo d’ensayu por ‘Hai una llinia trazada. Historia de la música asturiana’, “obra que percuerre la historia de la música asturiana dende que los y les habitantes d'esta tierra vivíen en cueves hasta'l presente”. Al facer un repás per distintes époques el cantante de Dixebra paró nel Reinu d’Asturies pa reclamar al Gobiernu aprovechando la celebración del Xacobéu la obra entitulada ‘O Dei Verbum’, conocida davezu como ‘Himnu a Santiago’, compuestu na corte de Pravia de la que yera rei Mauregato (sieglu VIII), amuesa de que “na identidá política asturiana la música tuvo bien d'importancia yá dende mui ceo na historia”.

“El mio enfotu con esta obra foi facer un repasu pelos momentos, movimientos y intérpretes más importantes al traviés de los sieglos, resaltando los datos y fechos que foron cruciales nel devenir de la nuestra música. Y ello dende un puntu de vista non colonial, considerando a la música asturiana como un ente vivu y autónomu, non supeditáu nin dependiente d'otros procesos. Una historia contada dende dientro de la propia música del país, con un enclín claramente pedagóxico-divulgativu y militante nacional, social y culturalmente. Creo qu'una panorámica global y amplia del fechu musical asturianu ye la meyor ferramienta pa comprender y analizar qué representó y representa la nuestra música y sobre qué base se sofita'l so futuru”, siguió Elipe.

Pa finar, l’avilesín quixo rescamplar que “los músicos, pero tamién los escritores, los profesores, los periodistes, los filólogos, los actores... yá tenemos fechu'l nuestru llabor de preparar a esti idioma pa les necesidaes creatives, artístiques y comunicatives d'una sociedá del sieglu XXI. Nós cumplimos, agora toca que los nuestros representantes políticos asuman la so responsabilidá histórica declarando, ensin mieu a los negacionistes llingüísticos y los discursos del odiu idiomáticu, la oficialidá de les llingües propies: l'asturianu y el gallego-asturianu. Un país pequeñu como Asturies nun pue permitise desdexar o, nel peor de los casos, perder elementos trescendentales del nuestru ser colectivu como la llingua o la música propies, qu'ayuden a la so cohesión interna, visibilícenla nel contestu internacional y ye de lo meyor que como comunidá humana podemos ufiertar al mundu”.

La memoria

L’últimu premiu lliterariu n’entregase foi’l XII Premiu Alfonso Iglesias de cómic, que recayó per segunda vegada en Vázquez García, nesta ocasión por ‘El sol na escombrera’, que rellata la vida de José Fernández Sánchez, un neñu asturianu de la guerra. Si nel 2017 fixo’l so discursu en castellanu, esplicó, a mou de protesta por nun recibir escolarización n’asturianu, nesta ocasión emplegó l’idioma al pescanciar un cambiu nel Gobiernu respeuto de la llingua asturiana.

“El 34, les fuelgues mineres del 60…, y non Cuadonga, ye lo que nos da identidá”, aseguró nun discursu improvisáu a partir d’un guión. Nel mesmu faló de la bandera monárquica española y de l’asturiana, “qu’en décades nun va ser identitaria”, y espresó’l so enfotu “na historia de los que perdieron y llucharon por tener una vida meyor”, criticando que nun se trate nes escueles nin na TPA, “onde nun hai películes o documentales políticos”.

“¿Molesta entovía la nuesa memoria?”, entrugóse, reconociendo que si nun primer momentu’l so trabayu de recuperación de la memoria movíase “nel amor y el respetu a unes persones qu’almiraba, pa que se fixera xusticia”, anguaño “el rencor, la venganza y el resentimientu” tán presentes. “Agora comunista ye un insultu”, llamentó, una situación que, aseguró, “vien de razones culturales y educatives”.

Por último Iglesia salió a recoyer IV Premiu y Festival Nel Amaro de Teatru Profesional en Llingua Asturiana o Gallego-asturiano, pa Higiénico Papel por 'El viaxe de Covaletti', que dio les gracies “a la xente que me deprendió asturianu”. Llamó tamién al lleonés Dávila, actor protagonista de la obra ganadora, que tamién amosó la so allegría pol premiu y apuntó que “la lliteratura ye siempre fonte d’imaxinación y de vida”.

La del 2021, n’avientu

Una actuación musical d’Ana Fernández Palacio, al pianu, y de Naomi Suárez González, a la viola, punxo’l ramu a la gala, anque enantes salió García a dicir unes pallabres a los gallardonaos y convidaos. El direutor xeneral emponderó los premios y faló de los sos nicios, enantes de la declaración del Estatutu d’Autonomía y de la creación de l’Academia de la Llingua, unes convocatories que permiten “que se dea’l milagru de cada añu d’autores qu’escriben, corrixen, acuriosen y presenten al xuráu les sos creaciones pa que consideren qu’ameriten el premiu”.

Un milagru "que se debe al compromisu cultural de los creadores, al compromisu cola llingua asturiana”, siguó García, que definió a les obres ganadores como representantes de “la escelencia de la nuesa cultura”. Una referencia que sirve “pa pulsar cómo camina la nuesa lliteratura”.

Por último, espresó una opinión “de calter personal” sobre toles obres ganadores y faló d’iniciatives del so departamentu como’l programa ‘Asturies, cultura en rede’ y el proyeutu La Casina de la Traducción, ente otros, asina como les novedaes de los Premios Lliterarios del 2021, que deseó festexar con “una gala multitudionaria n’avientu celebrando que llegamos a la normalidá”.

Na semeya, Villa, Suari, Galán, García, Elipe, Vázquez García, Fernández-Osorio, Dávila y Iglesia.