LLABoral acueye la gala d'entrega de los Premios Lliterarios 2020

La situación sanitaria actual permite entamar por fin l'eventu, con asistencia por invitación.

La gala d'entrega de los Premios Lliterarios y Artíticos 2020 va celebrase esta tarde, a les 18.30 hores, na Sala Chill-out del xixonés LLABoral Centru d’Arte y Creación Industrial. Na mesma, Sidoro Villa va recibir el XLI Premiu Xosefa Xovellanos de novela por 'El fervinchu'; Alejandro Fernández-Osorio’l XXVI Xuan María Acebal de poesía por ‘Tayu’; Xune Elipe'l XXVI Premiu Máximo Fuertes Acevedo d’ensayu por ‘Hai una llinia trazada. Historia de la música asturiana’; Vero Suari y Inaciu Galán el XIII Premiu María Xosefa Canellada de lliteratura infantil y xuvenil por ‘La curuxa Catuxa’; Alberto Vázquez García'l XII Premiu Alfonso Iglesias de cómic por ‘El sol na escombrera’; y Higiénico Papel Teatro'l IV Premiu y Festival Nel Amaro de Teatru Profesional en Llingua Asturiana o Gallego-asturiano por 'El viaxe de Covaletti'.

El direutor xeneral Antón García va encargase de presidir l'actu ente l'ausencia esti añu de Berta Piñán, conseyera de Cultura, Política Llingüística y Turismu, pola presencia n'Asturies del secretariu d'Estáu de Turismu, Fernando Valdés. Mentes, van poner el toque musical al eventu Ana Fernández Palacio (pianu) y Naomi Suárez González (viola).

Na semeya, esposición ‘Nel Amaro-Postal/Visual' que va tar instalada hasta'l día 26 nel estragal de LLABoral y que los asistentes a la gala van visitar.