La Casina de la Traducción va echar a andar a lo primero d’ochobre

Berta Piñán, conseyera de Cultura, Política Llingüística y Turismu, acudió a Cadavéu pa visitar la casa natal del Padre Galo, que va acoyer el proyeutu de La Casina de la Traducción. El 1 d’ochobre ta prevista la robla del conveniu col Conceyu de Valdés cola intención d’inaugurala coles primeres Xornaes de la Traducción al Asturianu.

Acompañada por Antón García, direutor xeneral de Política Llingüística, viose esta mañana col alcalde Óscar Pérez Suárez y el conceyal de Cultural, Ismael González Suárez, colos que percorrieron dellos puntos del conceyu. El motivu principal de la visita taba en Cadavéu, na casa natal de Fernán-Coronas, el Padre Galo, pa concretar el proyeutu de La Casina de la Traducción.

“Queremos pal 1 d’ochobre firmar el conveniu sobre toles actuaciones que tamos falando col Ayuntamientu y a partir d’ehí empezar yá con unes xornaes qu’inauguren tamién esa faceta que queremos que sía La Casina de la Traducción”, apuntó Piñán, “un llugar onde pivote la idea de la traducción nun sentíu mui ampliu y que de dalguna forma sía referente nel arcu atlánticu”. Asina, refirióse “a les llingües que’l Padre Galo falaba y conocía, y vamos a empezar con coses mui sorprendentes como que trabayaba en traducciones del xaponés, del árabe, del occitanu…, de tantes llingües; y a partir d’ehí empezar un proyeutu realmente importante que creemos que va consolidase y crecer col tiempu”.

La Casina de la Traducción va arrancar na seronda coles primeres Xornaes de la Traducción al Asturianu y va promover alcuentros periódicos, talleres y seminarios nos que s’estudie y analice’l procesu históricu de la traducción al nuesu idioma y del asturianu a otres llingües y la so proyeición de futuru. La collaboración ente la conseyería y el Conceyu tamién va llevar al entamu d’aiciones destinadas a rescamplar la imaxe de Valdés y fomentar el turismu.

Asina, la visita completóse con paraes nel castru de Peña Castiel, en La Telaya y nos xardinos de la Fonte Baxa, abiertos al públicu na so totalidá dende marzu.

Na semeya, González Suárez, Piñán, Pérez Suárez y García frente a un panel sobre'l Padre Galo na so casa natal.