L’alcuentru que va inaugurar La Casina de la Traducción va celebrase del 17 al 19 d’avientu

Rafael Rodríguez Valdés va coordinar un alcuentru sobre la torna lliteraria al asturianu del 17 al 19 d’avientu en La Casina de la Traducción, eventu que va inaugurar esta iniciativa que tien la casa natal del Padre Galo como sede. Nestes xornaes van participar persones actives nesti campu pa esplorar les sos llinies de futuru.

Anunciáu en xunu como Xornaes de la Traducción al Asturianu, tien confirmada l’asistencia de Cristina Valdés, Marta Mori, Aida Celamín, Aymara González, Víctor Suárez, Miguel Sánchez, Xesús González, Daniel Melendi, Eloy Antuña y Ramón d’Andrés, ente otros. Un amiestu de mocedá y veteranía pa entamar un alderique sobre la traducción a distintes llingües y xéneros lliterarios y encarar les necesidaes que traviesa’l sector na actualidá.

El primer día del alcuentru, el vienres 19, va centrase nos temes rellacionaos cola traducción anterior al Surdimientu, una retrospectiva coles mires d’ellaborar un balance críticu d’esi momentu. El sábadu los conteníos principales van xirar al rodiu del modelu llingüísticu, la traducción intermedia, el pesu de la lliteratura castellana y los horizontes de la traducción al asturianu.

Pa finar, na mañana del domingu van tratase los bloques qu’estudien la función social del traductor y la traducción a otres llingües, pa zarrar esta primer actividá de La Casina de la Traducción de tarde cola esposición de conclusiones a partir de lo tratao esa fin de selmana en Cadavéu nel llar de Fernán-Coronas.

Firma del conveniu

Esti sábadu pasáu la conseyería de Cultura, Política Llingüística y Turismu, representada por Berta Piñán, y el Conceyu de Valdés, pol alcalde Óscar Pérez Suárez, roblaron el conveniu pa impulsar La Casina de la Traducción, previstu nun primer momentu pa ochobre. El so oxetivu, fomentar la traducción asturiana nuna doble direición, dende l’asturianu a otres llingües y dende otres llingües al asturianu; l’entamu d’alcuentros culturales periódicos de calter internacional; y l’intercambiu cultural con otros territorios, sobre manera del arcu atlánticu, asina como la promoción turística de Valdés.