Asturies enllaza trés meses de descensu y baxa de los 80.000 paraos

Mayu finó con 3.601 demandantes d’emplegu menos n’Asturies, una baxada liderada pola construcción y la industria. Supón una mengua del 4,31 por cientu, superior a la media estatal, del 3,31, y dexa la cifra total de paraos en 79.941 llueu de trés meses siguíos de descensu.

Ye la primer vegada que se baxa de los 80.000 desemplegaos en 7 meses, periodu nel que s’algamó un tope de 85.781, en febreru. 1.064, 1.175 y, agora, 3.601 foron les cantidaes nes que menguó’l paru los 3 últimos.

La baxada ye del 4,31 por cientu, pol 3,31 estatal, 129.378 persones que ponen el total de paraos en 3.781.250. En toles autonomíes desciende la demanda d’emplegu, rescamplando Illes Balears, con un 8,18 por cientu; Navarra, con un 7,63 por cientu; y La Rioja, 6,16 por cientu.

En términos interañales, el paru baxó n’Asturies en 3.919 persones, un 4,67 por cientu. La media estatal ye del 1,98 por cientu, al menguar en 76.526.

Les baxaes más importantes danse en Galicia (13,49 por cientu), Euskadi (13,48) y Melilla (13,04). Por contra, aumenta en Canarias (6,26 por cientu), Comunidad de Madrid (2,07), Melilla (0,99), Illes Balears (0,89) y Aragón (0,57).

Aumentu de la contratación

L'afiliación a la Seguridá Social creció en mayu en 3.245 persones, hasta asitiase en 362.662, lo que supón un 0,90 por cientu más. En términos interañales, rexístrense 12.051 afiliaos más (3,44 por cientu).

En mayu formalizáronse 23.743 contratos, un 49,98 por cientu más que n'abril y un 134,87 por cientu más que nel mesmu mes de 2020. Entrambos casos, la evolución d'Asturies ye muncho más favorable que la media estatal, asitiando al territoriu como’l segundu con meyor evolución de la contratación.

Los indicadores d'afiliaciones a la Seguridá Social y de paru rexistraos lleven a un amenorgamientu en 2.914 de les persones trabayadores incluyíes n'espedientes de regulación temporal d'emplegu, lo qu'asitia la cifra total d'emplegaos regulaos por esta figura en 9.499.

Pa consultar los datos del paru de mayu, calca equí.