Torna a baxar el paru n’abril, cuando se produz el primer descensu interañal en pandemia

Per segundu mes siguíu, llueu de seis d’ascensu, mengua’l númberu de demandantes d’emplegu n’Asturies. Baxó en 1.175 persones, un 1,11 por cientu, perriba de la media estatal, asitiada nun 0,99 por cientu, y rexístrase per primer vegada en pandemia un descensu interañal del paru, en concreto en 251 persones, un 0,30 por cientu.

El total de desemplegaos queda en 83.542, con ameyoramientu n’homes y en muyeres, en tolos tramos de edá y en tolos sectores d’actividá, sobre manera nos servicios, con cerca d’un millar de paraos menos. Rescampla sobre manera la cayida del paru ente menores de 30 años, un 2,91 por cientu, con 409 demandantes menos.

L’autonomía con meyores datos de baxada del paru ye Galicia, con un 5,50 por cientu, siguida d’Aragón (3,16 por cientu) y La Rioja (2,91). Xubió’l desemplegu en Canarias (0,67 por cientu), Ceuta (0,64), Comunitat Valenciana (0,09) y Cantabria (0,08).

Xubida a nivel estatal

A nivel interañal, la demanda baxó per primer vegada n’Asturies dende l’entamu de la pandemia, en concreto un 0,30 por cientu, en 251 persones, cuando la media estatal foi un aumentu del 2,07 por cientu. La mayor mengua protagonízala tamién Galicia (10,88 por cientu), con un porcentaxe mui asemeyáu a Melilla (10,59), mentes qu’Illes Balears (13,13 por cientu) y Canarias (10,80) sigue siendo onde más medra, anque ensin tanta diferencia como en meses anteriores.

La recuperación de l’actividá n’Asturies y, poro, del emplegu tien la so traducción nel volume de contratos y nes afiliaciones a la Seguridá Social. Asina, n’abril se contabilizaron 20.241 contrataciones, lo que supón un aumentu del 180,04 por cientu con respeuto al mesmo mes del añu pasáu (13.013 contratos más), qu’asitien al país como’l segundu territoriu con más crecimientu per detrás de Cantabria.

Otra manera, l’afiliación creció n’abril en 1.616 persones (0,45 por cientu) hasta asitiase en 359.418 cotizantes, lo que significa 8.421 emplegos más qu’hai un añu. El númberu medio de trabayadores que tuvieron en regulación de emplegu n’abril foi de 12.926, según datos de la Seguridá Social.

Calca equí pa consultar los datos del paru.