Les cifres del paru tornen al nivel anterior a la pandemia de COVID-19

Asturies zarró xunu con 72.359 demandantes d’emplegu, cifra menor que la rexistrada en febreru del 2020, enantes del entamu de la pandemia, cuando había 72.940. El paru baxó en 7.582 persones nesti mes últimu, récor de la serie histórica, lo que supón un descensu del 9,48 por cientu, el segundu mayor del Estáu detrás d'Illes Balears.

En febreru d’esti añu algamóse’l tope de la pandemia, con 85.781 paraos llueu de seis meses de xuba continua. En cuatro meses esta cifra rebaxóse hasta los 72.359, esto ye, en 13.422 persones, confirmando la reactivación económica provocada poles espeutatives que ta dexando’l desendolcu de la campaña de vacunación contra la COVID-19.

Los 7.582 desemplegaos menos rexistraos en xunu supón el meyor rexistru de la serie histórica. Tamién la segunda mayor baxada porcentual del Estáu, un 9,48 por cientu, namái superada por Illes Balears, con un 16,72 por cientu, y siguida por Melilla y Catalunya, con un 7,57 y un 7,46 por cientu, de manera respeutiva.

La media estatal quedó nel 4,41 por cientu al contabilizase 166.911 demandante d’emplegu menos, tamién récor de la serie histórica, pa poner el total de paraos en 3.614.339. Les menores baxaes diéronse n’Euskadi (0,21 por cientu) y Murcia (0,31 por cientu).

En términos añales, la mengua n’Asturies foi de 8.361 persones, un 10,66 por cientu, superior tamién a la media estatal, del 6,43 por cientu, al rexistrar 248.544 paraos menos. Los meyores datos tiénenlos Melilla (20,78 por cientu), Illes Balears (15,54) y Euskadi (15,29), mentes que les úniques autonomía onde medraron les cifres del paru foron Canarias (4,88) y Comunidad de Madrid (0,66).

El sector servicios y la industria lideraron les baxaes el mes pasáu nel país. Tamién rexistra datos positivos l’afiliación a la Seguridá Social, un 1,1 por cientu, y la contratación, un 25,32 por cientu, sicasí la gran mayoría de calter temporal.