Xuan Nel Gonzali va recibir el reconocimientu de Repunante d'Honor

El sábadu tien llugar en La Pola Llaviana'l VIII Congresu Nacional de Repunantes.

El restorán El Pintu ye'l llugar escoyíu pa la celebración d'esta cita, na que Xuan Nel Gonzali, una de les persones fundadores, va recibir el reconocimientu de Repunante d'Honor. L'actu va principiar a les 20 hores con puertes abiertes pa proceder llueu a la robla y entrega de los diplomes d'asistencia por parte del presidente del Conceyu de Repunantes, David M. Rivas, a los presentes, entes los que va tar el diputáu Adrián Pumares.

A les 21 hores va arrancar el Reconocimientu del Repunante d'Honor con un resume y presentación del VIII Congresu Nacional de Repunantes, la intervención d'una persona de "alta autoridá' pa facer repunar al condecoráu asina como a tolos presentes, y una glosa por parte de Rivas. Darréu, Gonzali, qu’esparde la filosofía del Conceyu de Repunantes "perdayuri con especial enfotu nel pallabru 'sociollistos' pa nomar les polítiques arecistes, mudistes ya barbonistes nos caberos años pal país de nueso", va recibir l'espetu de plata, el Diploma d'Honor y una caricatura.

La hora de sentase a cenar ta programada a les 22, con un menú a un preciu de 26 euros que va tar compuestu por xamón de gochu asturcelta con boroña y tomate; tortu con morciella, pera y miel de Caliao; merluza del pinchu con pistu a l'asturiana; cabritu guisáu con pataquinos y pimientos asaos; arroz con lleche y fayuelos; sidra de mesa Viuda de Angelón; y Vinu de Cangas La Descarga. L'esperáu discursu del presidente va poner el ramu al Congresu, que tien un tope máximu de 32 places, polo que ye necesariu acutar plaza pa participar enantes de les 23.59 hores de mañana.