"La repunancia sigue viva ya con puxu", espresó Xuan Nel Gonzali

|
Xuan Nel Gonzali y David M. Rivas VIII Congresu Nacional de Repunantes en La Pola Llaviana

Llaviana acoyó'l VIII Congresu Nacional de Repunantes cola asistencia d'Adrián Pumares.

Xuan Nel Gonzali recibió'l reconocimientu de Repunante d'Honor nel eventu celebráu nel restorán El Pintu, en La Pola, el pasáu día 22. Un actu "con gran ésitu" nel que s'axuntaron 25 persones pa repunar y cenar xamón de gochu asturcelta con boroña y tomate; tortu con morciella, pera y miel de Caliao; merluza del pinchu con pistu a l'asturiana; cabritu guisáu con pataquinos y pimientos asaos; y arroz con lleche y fayuelos, con sidra de mesa Viuda de Angelón y Vinu de Cangas La Descarga pa beber.

Per primer vegada participó nel Congresu un diputáu, Pumares, de Foro, que recibió'l so correspondiente diploma d'asistencia. Pudo presenciar en direuto'l discursu del presidente soberanu del Conceyu de Repunantes, David M. Rivas, que, primero, protagonizó la receición solemente a Gonzali.

"Ye pa min un grande honor arrecibir nel areópagu de los repunantes d'honor a Xuan Nel Gonzali y de, una vegada diches unes pallabres, imponéi l'emblema'l so rangu que, nel nuesu casu, ye más entá: ye de ringorrangu", principió, pa llueu afirmar que "ye ún de los camises vieyes de la repunancia organizada, como los garibaldianos, que lo de la camisa nun lo inventaran los paseantes del amanecer, aquellos valientes de retaguardia. Ye ún de los factotum del asuntu y puede qu'el principal". "Arrecibe, Xuan Nel, el títulu y la medaya del to rangu. Pon bon facer ellí onde vaigas, protexe a los débiles de la crueldá de los maltomaos, defende la causa d'Asturies y, por favor, ¡vacúnate y nun faigas el piḥo!", dixo-y enantes de llanta-y l'espetu de plata y entrega-y el dIploma personalizáu, tamién obra del artista Berto Peña.

Llueu de ximelgar una llibreta de 200 páxines y citar a Fidel Castro –"güei quiero facer repunar, tolo que pueda, fasta Fidel Castro incluyíu si pudiere, col discursu que teo nes manes de mio…"–, col oxetivu de meter mieu a los repunantes presentes con un discursu llargu, Gonzali, fiel los postulaos que-y fixeron algamara la distinción, aparte de facer una pequeña esbilla de fechos la vida de so, centró'l discursu al rodiu la "pLandemia" y los "sociollistos". Tamién dedicó unes pallabres a Pumares, apuntando-y que ta énte "una oportunidá hestórica ya, de pasu, mandar p’allalantrones los sociollistos" nel casu de convocar "una rueda prensa diciendo que queréis la oficialidá darréu ya que vais presentar moción pa votar nel Parllamentu asturianu enantes del branu (lo mesmu nun vos da tiempu, colo de les vacaciones de la Santa Selmana)".

"Bono voi terminar que, de xuru, tenéis fame (yo tamién). Agradecevos, de verdá ya fonderamente, esti di pa conmigo yá que, si podéis ya si vos atrevéis, saltéis, de xemes en cuando, la sebe. Porque una sebe nun ye nada, masque trés sebes son una oveya; trés oveyes ún caballo; trés caballos ún paisanu; trés paisanos un cuervu; trés cuervos un carbayu; trés carbayos un teixu; ya trés teixos un reinu. Yá pasaron munchos reinos ya la repunancia sigue viva ya con puxu", finó Gonzali, que recibió nesi momentu una caricatura de Ferant.

Políticos menos maltomaos

Depués de la cena, punxo'l ramu al Congresu'l discursu del presidente, entituláu 'Los repunantes na formación de la nación asturiana'. "Un añu más cellebramos el nuesu Congresu Nacional que güei reunimos en La Pola, villa capital de Llaviana, conceyu que ye berciu d'illustes compatriotes, del qu'el menor nun ye, precisamente, el presidente Barbón. Por favor, de pies ya inclinatio capitis", entamó Rivas, que dixo tar contentu "del balance d'esti cursu pasáu. La nuesa asociación va medrando y, pesie a la nuesa particular idiosincrasia, dengún nun marchara nin fuere espulsáu, anque dalgún de los de la primera hora sigui cola so matraca de que cualisquier aconceyamientu en más al sur de Güerces, al és de Deva y al oés de Veriña ye cadiós y tenemos que disculpar la so ausencia otru añu".

"Esti añu tamién mos dexara una bona noticia: los políticos asturianos van faciéndose más repunantes y menos maltomaos, que ye como dicir que más del espíritu de Bimenes y menos del espíritu del alcázar de Toledo, más d'Urraca que de Sabel II y más d'Álvaro Flórez que de Lola Flores. Paez ser que la oficialidá del asturiano ye posible ya yelo porque los amos del país paez que somatizaron tolo que yera mester somatizar ya entraron na destinización y na desjavierización, una vuelta desapaecíu el déspota y desmontada la vieya guardia del astursocialismu realmente esistente", siguió enantes d'entrar nel fondu de la so intervención, que pue consultar nesti enllaz.

Otra manera, tamién pue lleer la receición solemne a Gonzali redautada por Rivas y el discursu completu del Repunante d'Honor.

Na semeya, Gonzali col Diploma d'Honor y Rivas.

Contador Estadistiques