Castañón recibió la condecoración de Repunante d'Honor

|
David M. Rivas y David Castañón Repunante d'Honor VII Congresu Nacional recortada

Cuasi una trentena de persones participaron nel VII Congresu Nacional de Repunantes celebráu nel Abrelatas de La Pola Siero.

Con dalgo de retrasu sobre l'horariu anunciáu echó a andar l'actu, una espera que se salvó con charres ente los presentes y l'habitual robla y entrega de diplomas a los asistentes. Xuan Nel Gonzali protagonizó'l primer discursu, centráu na situación del Conceyu de Repunantes, con un resume del pasáu, el presente ya’l futuru la repunancia oficial yá organizada.

Dempués, como vien yá siendo vezu, Moisés Noval intervino pa facer repunar, en forma, al Repunante d’Honor y al restu los invitaos, con un discursu centráu nos fallos y anéudotes de David Castañón, gastrónomu que nesta ocasión recibía'l gallardón. De siguío vieno la glosa que-y fixo’l presidente del Conceyu de Repunantes, David M. Rivas, nel qu’espuso los méritos algamaos pa llevar el reconocimientu.

"David Castañón entra nel panteón de los Repunantes d’Honor. Porque Fartañón ye repunante cum laude. Y como tal, igual-y repunaba arrecibir el premiu. Pero non, aceutólu con allegría. La verdá, pienso yo, repunante como’l que más, negase a un premiu ye vanidá, ye apostar a dar más que falar y a facete más famosu, a la espera de que te lu den póstumu y más grande. Pero, como diría un intellectual al altor de Castañón, Hugo Sánchez, los homexes en vida", espuso Rivas enantes de llanta-y l'espetu de plata na chaqueta y face-y entrega del Diploma d'Honor y una caricatura, toos fecho a mano.

El condecoráu agradeció'l títulu con un discursu prestosu y emocionante, ensin escaecer la repunancia, pallabres nel que tuvo recuerdos pa delles personalidaes de l'actualidá, de "Xovellanos-Cascos" a Barbón, pasando por "Morciyón" o "Nachín Prendes". L'actu dio pasu a la cena, a cargu del cocineru Borja Alcázar, que per primer vegada nun contó con sidra natural, polo que les bébores foron sidra brut y vinu de Cangas.

El tradicional discursu del presidente zarró'l VII Congresu Nacional, qu'entituló 'El repunante como categoría científica'. "La categoría de 'repunante', non namás ye de rangu científicu cuando l’analizamos como oxetu individualizáu d’estudiu, sinón que too paez indicar que la 'repunancia' cumple colos requisitos metodolóxicos pa ser un sistema, entendíu como conxuntu d’estructures agrupaes en modelos, conforme a la metodoloxía clásica fenomenolóxica que mos vienen dende Seaussure y Lévi-Strauss", aseguró Rivas.

Na semeya, Rivas llanta-y a Castañón l'espetu de plata.

 

 

Contador Estadistiques