La XLIII Selmana de les Lletres Asturianes va tar dedicada a Ígor Medio

Coincidiendo col 50 aniversariu de la so nacencia, la Conseyería de Cultura, Política Llingüística y Turismu decidió dedicar al dibuxante y músicu Ígor Medio, que dexó la vida na carretera nel 2006 cuando viaxaba con Felpeyu a Catalunya a tocar, la XLIII Selmana de les Lletres Asturianes. Berta Piñán anunciólo’l sábadu en Cangas na inauguración de la so XII Sumana de las Ḷḷetras Asturianas.

“Ígor Medio (1972-2006) realizó cola so estensa obra una contribución esencial al cómic n'Asturies, creando mundos qu'inda perviven nel imaxinariu colectivu, ente los que destaca la Familia Castañón. La Selmana de les Lletres Asturianes va xirar alredor del creador xixonés, y van tener especial protagonismu na so programación el cómic y la música”, especificaron darréu dende Política Llingüística.

Ésta va ser la primer vegada que la gran fiesta de la nuesa lliteratura se celebre alredor d’un dibuxante y d’una persona nacida na década de los 70 del sieglu pasáu. Esti añu la Selmana tamién se dedicó a un creador nun centráu namái na xera d’escribir, como foi’l casu del artista multidisciplinar Nel Amaro.

Na so presencia en Cangas del Narcea, onde estos díes hai actividaes diaries al rodiu la llingua asturiana con motivu de la XII Sumana de las Ḷḷetras Asturianas, Piñán tamién faló sobre la oficialidá, señalando que “ye un procesu que nun depende d’una voluntá, sinón de munches voluntaes y esperamos que toles voluntaes s’axunten nesi camín y podamos presencialos y tar ehí trabayando por ello”. La conseyera tuvo acompañada nel actu celebráu na Casa de Cultura Palacio d’Oumaña pol alcalde José Víctor Rodríguez Fernández.

‘La Familia Castañón’

L’anuncia de que la próxima Selmana de les Lletres Asturianes va tar dedicada a Medio coincide nel tiempu cola puesta en marcha d’un proyeutu editorial que recueye la totalidá de les tires cómiques de ‘La Familia Castañón’ xunto con delles inédites. Baxo’l nome de ‘Too Castañón 1997-2006’ ta activa una campaña de micromecenalgu qu’en pocos díes cubrió los 4.500 euros necesarios pa ser realidá.

Güei, a falta de 26 pa’l so pieslle, acumula un total de 6.395 euros y los impulsores, collacios de Medio nel so enfotu por caltener viva la so memoria y trabayu, yá anunciaron que d’algamar los 7.000 van destinase 150 exemplares a la Conseyería de Cultura, Política Llingüística y Turismu pa la so distribución ente les bibliotecas públiques, los servicios de normalización llingüística y los clubes de lectura de los centros culturales del país. Hai delles opciones de merca, dende los 25 euros del llibru con gastos d’unvíu hasta los 100 qu’inclúi tamién una coleición de 5 taces colos personaxes de les tires y una bolsa de tela col güelu Castañón, con entregues previstes pa xunetu.