La XLII Selmana de les Lletres Asturies va recordar a Nel Amaro

Nel 2021 Manuel Amaro Fernández, Nel Amaro, que nos dexó un 4 d’abril del 2011, cumpliría 75 años. La Conseyería de Cultura, Política Llingüística y Turismu, d’alcuerdu cola so familia, decidió dedicar la XLII Selmana de les Lletres Asturianes a esti autor polifacéticu concidiendo con esti aniversariu y el décimu de la so muerte.

Nacíu en Quentuserrón nel añu 1946, Amaro foi un poeta, novelista, dramaturgu y artista de la xeneración del Surdimientu que tamién escribió en castellanu. Nos sos años últimos convirtióse nun de los principales dinamizadores culturales de la cuenca del Caudal, averándose a les teunoloxíes nueves.

“Ye ún de los escritores más carismáticos y más queríos de les lletres asturianes”, destaquen dende la conseyería. “Como autor n’asturianu destaca’l conxuntu de la so obra, qu’abarca novela, poesía, teatro, ensayu o cuentos, y el fechu de tar siempre abriendo camín. Nel Amaro foi ún de los primeros escritores n’espublizar la poesía nueva del Surdimientu, el primeru n’espublizar una poética o reflexón sobre la razón de ser de la poesía nueva que se taba faciendo y el primeru n’escribir teatru nuevu. Anque tardó en publicar, dexó una nómina bien importante d’obres editaes y dalgunes inédites”, añaden.

Posiblemente, dalgunes d’elles van dase a conocer na espublización tradicional pola Selmana de les Lletres Asturianes, que tendrá llugar del 3 al 9 de mayu, al ser el vienres de la primer selmana, día 7 nesta ocasión, la fecha habitual de celebración del Día de les Lletres Asturianes. “Ye’l momentu afayadizu pa dedica-y a Nel Amaro la Selmana de les Lletres, reivindicar la so figura lliteraria y humana, y rendi-y un homenaxe nel que s’implique la sociedá lliteraria y artística asturianes”, afirmen dende Cultura.

Añu Nel Amaro

Yá se ta trabayando na programación d’un ‘Añu Nel Amaro’, “nel que se-y pondría atención a la so obra y se promoveríen representaciones de los sos testos teatrales, igual que publicaciones sobre la so trayectoria personal y lliteraria y sobre’l so arte o exposiciones”. L’artista mierense yá da nome al gallardón de teatru n’asturianu y gallego-asturiano de la conseyería que s’entamó nel añu 2017 y que va celebrar la so sesta edición nel 2021.