Barbero y Norman Fernández van coordinar la XLIII Selmana de les Lletres Asturianes, dedicada a Ígor Medio

Depués de dedicar la edición última a Nel Amaro coincidiendo col 75 aniversariu de la so nacencia, la Conseyería de Cultura, Política Llingüística y Turismu va homenaxar a Ígor Medio nel 2022, cuando l’artista cumpliría 50, na XLIII Selmana de les Lletres Asturianes. Por esti motivu va centrala nel cómic y la música, les disciplines que prauticó.

El tamién dibuxante y músicu Ruma Barbero, col que fundó nel 1991 el grupu folk Felpeyu, y Norman Fernández Tascón, autor de delles monografíes sobre la historieta, amás de comentarista y articulista sobre cómics y collaborador habitual de la ‘Semana Negra’ de Xixón y d’otros eventos sobre’l cómic asturianu, van ser los coordinadores de los eventos que s’entamen del 2 al 8 de mayu. Una bona forma de recordar a Medio, que nos dexara la Nueche de San Xuan del 2006 nun accidente de carretera cola so banda camín de Catalunya nel que tamién perdió la vida Carlos Redondo.

Intérprete de bouzouki y voz en Felpeyu, tuviera tamién un proyeutu musical xunto con Lisardo Prieto de nome Dual, fixera de productor y arreglista pa formaciones como Tejedor o Gatos del Fornu, y creara la casa de discos Tierra. Tamién rescampló como dibuxante de cómics, con ‘La Familia Castañón’ como trabayu más reconocíu y propuestes como ‘Love Gun’ xunto con Javier Rodríguez.

Historia del Día y la Selmana de les Lletres

Ésta ye la primer vez qu'una persona nacida na década de los 70 del sieglu pasáu va protagonizar la Selmana de les Lletres Asturianes. Esta celebración vien entamándose dende’l 1980 como una única xornada, cuando la Diputación entamó’l primer Día de les Lletres Asturianes, que pasa a organizar nel 1983 l’Academia de la Llingua Asturiana (ALLA) depués de que nel 1982 tuviera llugar la primer Selmana, entovía baxo la tutela del órganu preautonómicu.

El Gobiernu empezaría a dedicar la Selmana de les Lletres nel 1989 a una persona, siendo la primera escoyida Xosé Caveda y Nava, y dende’l 2005 foi incluyendo tamién celebraciones temátiques, que s’estrenó cola centrada na poesía asturiana contemporánea. El XLIII Día de les Lletres Asturianes va tener llugar el vienres 6 de mayu col actu académicu de l’ALLA nel Teatru Campoamor.