‘Nel Amaro, la voz comprometida’ ye’l lema de la XLII Selmana de les Lletres Asturianes

El llunes 3 de mayu en Mieres van echar a andar les actividaes de la XLII Selmana de les Lletres Asturianes, que se van desendolcar baxo’l lema ‘Nel Amaro, la voz comprometida’. L’actividá creadora del poeta, novelista, dramaturgu y artista de Quentuserrón fináu nel 2011 protagoniza la gran fiesta de la nuesa lliteratura.

La Direición Xeneral de Política Llingüística quier reivindicar asina la figura humana y artística del mierense coincidiendo colos diez años de la so muerte y los 75 de la so nacencia. L’escritor y profesor Xandru Fernández encárgase de coordinar toles actividaes asina como del llibru conmemorativu, que s’entitula ‘Pruebes d’autor. Les siete vides de Nel Amaro’, inclúi siete artículos sobre Nel Amaro y el contestu cultural, social y políticu de la so obra, qu’incluye amás material gráfico abondo, y va repartise nel Día del Llibru Asturianu que tien llugar coincidiendo col Día de les Lletres Asturianes, nesta ocasión el vienres 7.

Esta obra va presentase na inauguración de la XLII Selmana de les Lletres Asturianes que va tener llugar nel Auditoriu Teodoro Cuesta de Mieres al meudía, cita na que tamién se va estrenar un documental sobre Nel Amaro. Yá de tarde, Nun Tris va facer una llectura dramatizada de la obra ‘Antígona, por exemplu’, cola que Nel Amaro ganó’l Premiu de Teatru de l’Academia de la Llingua Asturiana nel 1991, actuación que se va grabar pa ponela depués a disposición de los centros docentes pa la so visualización con fines didáuticos.

D’igual forma, el centru mierense va acoyer, hasta’l 11 de xunu, una esposición sobre la vida y obra del artista que se va poder vistar de llunes a vienres de 12 a 14 y de 17 a 21 hores.

Homenaxe ás Nosas Lletras

El martes, a les 19 hores nel salón d’actos del Hotel d’Asociaciones de La Pola Ḷḷena, preséntase’l llibru ‘Esperté ensin patria pa dormir ensin pruyimientos de conciencia’, una antoloxía estensa de la obra narrativa, poética y teatral de Nel Amaro seleicionada tamién por Fernández, y coeditada pola Conseyería de Cultura, Política Llingüística y Turismu y Ediciones Trabe. Nesti mesmu actu, dellos performers y artistes visuales y de mail art van facer un homenaxe persingular al artista.

A la mañana siguiente l’actividá va treslladase a Xixón, cola inauguración al meudía en LLABoral Centru d’Arte y Creación Industrial d’una esposición que recopila la producción artística del Nel Amaro, incluyendo l’arte n’aición, la edición de espublizaciones o la creación d’obres de poesía visual. Ésta lleva’l nome de ‘Nel Amaro-Postal/Visual’ y va tar abierta hasta’l 26 de xunu, nos horarios siguientes: hasta’l 14 de xunu, de 10 a 19 hores, de miércoles a vienres, y 12 a 19 hores, de sábadu; y hasta’l 26, de 11 a 19 hores de miércoles a sábadu.

El yá tradicional Homenaxe ás Nosas Lletras va celebrase pela tarde, a les 19 hores, na Casa de Cultura d’As Figueiras, cola presentación del llibru ‘Al aveiro d’un trabatel. Úa escoyeta de poesía contemporánea en gallego-asturiano’, que se va entregar de baldre’l Día del Llibru Asturianu cola merca d’obres nesti idioma nes llibreríes del Eo-Navia y nunes poques d’Uviéu. El xueves, per otru llau, la Orquesta Sinfónica del Principáu d’Asturies, baxo la direición de Rubén Díaz, va interpretar el ‘Conciertu de les Lletres Asturianes’ a les 19 hores nel Auditoriu d’Uviéu con un programa formáu por ‘Rapsodia asturiana’, de Leoncio Diéguez Marcos; ‘Bricial, poema sinfónico’, de Guillermo Martínez; y ‘Don Quijote y la batalla de los rebaños’, poema sinfónicu tamíen de Diéguez Marcos.

Día del Llibru Asturianu

El vienres 7 de mayu, Día de les Lletres Asturies, ensin l’habitual gala d’entrega de premios de los concursos escolares, Política Llingüística adelanta’l concursu de microrrellatos asturianos improvisaos n’asturianu pa menores de 35 años ‘Entaína a escribir’, que nes cinco ediciones previes tenía llugar la selmana posterior. Amás cambia de sede, pasando d’Uviéu a LLABoral, en Xixón.

Nesta xornada tamién va celebrase’l Día del Llibru Asturianu nes llibreríes del país, con un descuentu del 10 por cientu pola merca de títulos o discos n’asturianu o gallego-asturiano y la entrega de baldre d’ún de los llibros conmemorativos correspondiente según la zona. Participen esti añu ldaba Regalos, Aldebarán, Antares, El Búho Lector, Casa del Libro (tamién en gallego-asturiano), Cervantes (tamién en gallego-asturiano), Chemi, Diocesana, Elías, Esfera, Garluc, Maribel, La Palma, Polledo, Puntos, Reconquista, San Pablo, II Milenio y Trabe (tamién en gallego-asturiano), n’Uviéu; Acuarel, De Bolsillo, La Buena Letra, Central, 4 Letras, La Habitación Propia, Paradiso, Roy, Te Gusta Leer y Mundo Sonoro, en Xixón; Disco 55, La Llocura, La Pilarica y La Torre, en Mieres; Casa Pérez, Patefa y San Pedro, n’A Veiga; Fnac y Naredo, en Siero; Pablo, en Bual; Treito, en Cangas del Narcea; Alfonso, n’El Franco; Las Dos Vías, en Grau; Muséu de la Sidra, en Nava; Gestión, en Parres; Rima, en Piloña; y Sol, en Samartín del Rei Aurelio.

Otra manera, l’Academia de la Llingua Asturiana entama con motivu del XLII Día de les Lletres Asturianes la so xunta estraordinaria, qu’esti añu torna al Campoamor depués de que l’añu pasáu tuviera que retrasase a ochobre y desendolcase nel Aula Magna de la Universidá d’Uviéu nun actu d’aforu mui reducíu. La entidá va acoyer nesti actu, que va principiar al meudía, a Xandru Martino y a Pilar Rubiera como académicu correspondiente y como miembru d’honor, de manera respeutiva.