“El pasu del tiempu va dándonos idea del valor que tenía l’arte postal de Nel Amaro”, apunta García

L’actual direutor xeneral de Política Llingüística yera una de les persones que tuvo’l privilexu de recibir l’arte postal de Nel Amaro, que “el pasu del tiempu va dándonos idea del valor que tenía”. Antón García acompañó a Xandru Fernández, coordinador, na inauguración de la esposición ‘Nel Amaro-Postal/Visual’ en LLABoral.

Esta mañana los primeros visitantes averábense a la instalación asitiada na entrada del Centru d’Arte y Creación Industrial, con accesu llibre, “que recueye la faceta más visual de Nel Amaro”, apuntó Fernández. L’escritor y profesor guió a los presentes, ente ellos la vilba del autor, Marta Baquero, pela mesma, esplicando los conteníos de les vitrines, les creaciones que cuelguen d’una parede llateral y los dos vídeos que se proyeuten en dos pantalles asitaes nel llugar, ún d’ellos el documental fechu pa esta XLII Selmana de les Lletres Asturianes que se dedica al artista multidisciplinar mierense.

Enantes espusiera la trayeutoria artística d’un home qu’entamó a crear “nun pobláu mineru de 7.000 habitantes ensin fotocopiadora”. Xunto a él, García rescampló qu’Amaro “terminó faciendo escuela”, con “una obra estensísima” que, nel casu concretu de la esposición que s’inauguraba, se centraba nel videoarte y l’arte postal.

Nesti puntu rellató que conociera de mozu al mierense y que fora una de les persones que solía recibir “les creaciones postales que facía”, exemplos d’esi arte postal que guarda “de manera desordenada”, asina como invitaciones a les sos perfomances. “Seguramente nun supiéramos apreciar el valor que teníen, obres con muncha creatividá. El pasu del tiempu va dándonos idea del valor que tenía’l so arte postal”, razonó.

La esposición ‘Nel Amaro-Postal/Visual’ va poder visitase hasta’l 26 de xunu nel centru xixonés asitiáu na Llaboral col horariu siguiente: hasta’l 14 de xunu, de 10 a 19 hores, de miércoles a vienres, y 12 a 19 hores, de sábadu; y hasta’l 26, de 11 a 19 hores de miércoles a sábadu.

Na semeya superior, García y Fernández na inauguración de la esposición, coles vitrines y la pantalla qu'amuesa les sos creaciones de videoarte detrás. Na inferior, parte de la esposición.