Nel Amaro va ser recordáu con un documental, dos esposiciones y dos llibros na Selmana de les Lletres

L’escritor y profesor Xandru Fernández va encargase de coordinar toles actividaes al rodiu la figura de Nel Amaro, al que va tar dedicada la XLII Selmana de les Lletres Asturianes, que torna a les sos feches habituales, nos primeros díes de mayu. Les iniciatives van consisitir nun documental sobre la so vida y obra, dos esposiciones y dos llibros.

Ún va ser una estensa antoloxía de la obra de Nel Amaro, seleicionada y comentada por Fernández, mentes que l’otru va consistir nun volume coleutivu qu’inclúi artículos d’escritores y investigadores sobre l’escritor y el so tiempu, igual que material gráfico abondo. Pa estos exemplares, y pal restu d’actividaes, la Conseyería de Cultura, Política Llingüística y Turismu ta trabayando cola collaboración dellos coleutivos, instituciones, creadores y investigadores, sobre manera cola de LABoral Centru d’Arte y los conceyos de Mieres y Ḷḷena, a los que l’artista tuvo especialmente venceyáu.

La XLII Selmana de les Lletres Asturianes dedícase al autor de Quentuserrón coincidiendo col setentenu quintu aniversariu de la so nacencia y el décimu de la so muerte. Novelista, dramaturgu, editor de revistes, autor de performances o introductor de la poesía visual n’Asturies, Nel Amaro ye ún de los escritores más versátiles y prolíficos de la lliteratura asturiana moderna.