Entama la vacunación con Janssen n'Asturies

Esti miércoles rexistráronse 104 casos nuevos de COVID-19 y finó una muyer de 94 años.

Ayeri aportaron a Asturies los primeros viales de Janssen, un total de 3.150 dosis, que se van a entamar a alministrar esta tarde. Estes vacunes que namái necesiten una puesta van destinase nun primer momentu al grupu d'edá d'ente 70 y 79 años, a los que tamién se tán destinando preparaos de Pfizer/BioNTech y Moderna.

La so llegada esperábase pal miércoles pasáu, pero la estauxunidense Johnson & Johnson, propietaria de la empresa belga, decidió paralizar los unvíos por recomendación del Gobiernu d'Estaos Xuníos tres l'apaición de posibles casos de trombu. L’Axencia Europea del Medicamentu, tres estudialo, recomendó la so alministración por ser los beneficios d'esta vacuna mui superiores a los riesgos.

Tasa de positividá asemeyada

A falta de la espublización de los datos oficiales de la COVID-19, la Conseyería de Salú comunicó la detección de 104 contaxos ayeri –l'actualización resta 1 positivu de díes anteriores por duplicáu–. Son 40 menos que'l martes, cuando se rexistraron 144.

El Serviciu de Salú del Principáu d'Asturies (SESPA) fixo 3.058 pruebes de diagnósticu d'infeición activa, polo que la tasa de positividá s'asitió nel 5,10 por cientu. La xornada anterior, con 3.588 tests, quedó nun porcentaxe asemeyáu, del 5,04 por cientu, mentes qu'a 7 díes yera del 5,35 por cientu –ayeri baxó al 5,17 por cientu–.

Hebo que llamenta la perda d'una muyer de 94 años, la 1.939 del andanciu. Tán hospitalizaos 165 pacientes con confirmación o sospecha de COVID-19, a los qu'hai que sumar 68 persones que tán na UCI, lo que significa 8 y 1 menos que'l martes, de manera respeutiva.

Esta medianueche

El zarru perimetral de Llanes y la entrada de les restricciones del nivel d'alerta 4+ van activase esta medianueche. Esti conceyu entró en riesgu estremu, nel que se caltienen Llangréu, que sigue ameyorando, y de Mieres, qu'empeoró nos datos del martes.

Pa consultar los indicadores de tolos territorios y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

41 biltos activos

Asturies informó al Ministeriu de Sanidá de la esistencia de 41 biltos activos, 10 más qu'hai una selmana, con un total de 391 casos. 16 d'ellos detectáronse estos 7 díes últimos, comunica la conseyería.