Selmana de les Lletres Asturianes

El Gobiernu estudia modificar el modelu 4+

|
Ana Cárcaba, Melania Álvarez y Pablo Ignacio Fernández Muñiz modificación 4+

El conseyeru de Salú avanzó flexibilizaciones nes restricciones actuales, pero non na hostelería. Rexistráronse 125 positivos esti xueves.

"Posiblemente los zarros perimetrales en llugar de ser per conceyos, ye dalgo que tamos estudiando, sían en poblaciones con problemas de mayor incidencia o con un biltu de les variantes nueves", esplicó Pablo Ignacio Fernández Muñiz tres el Conseyu de Gobiernu d'esta mañana. Esti cambiu nel modelu activu dende depués de Navidá, el nivel d'alerta 4+, entamaríase depués del fin del estáu d'alarma, previstu pal 9 de mayu.

Anguaño tán coles restricciones del nomáu 'riesgu estremu' Llangréu, Mieres y, dende güei, Llanes. Sicasí, el conceyu d'El Caudal va recuperar la normalidá nueva esti domingu pol ameyoramientu de los sos datos epidemiolóxicos, cola posiblidá que'l d'El Nalón faiga lo propio'l llunes si nun hai cambiu na dinámica actual.

Pa consultar los indicadores de tolos territories y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Esta tarde nel BOPA

Fernández Muñiz tamién avanzó qu'esta tarde va espublizase nel Boletín Oficial del Principáu d'Asturies (BOPA) una resolución con una flexibilización de les restricciones actuales pola pandemia de COVID-19. Ente elles va tar la vuelta a la competición de tolos deportistes federaos, asina como los escolares, o'l permisu de delles d'actividaes a feriantes hasta agora prohibíes.

Onde nun va haber cambios ye na hostelería. Coleutivos como Otea reclamaban l'allargue del horariu de l'apertura de los interiores de los chigres, anguaño permitío hasta les 21 hores, pero dende'l Gobiernu refuguen esta posibilidá hasta'l fin del estáu d'alarma.

Un fináu de 33 años y otru de 66

A falta de la espublización de los datos oficiales de la COVID-19, la Conseyería de Salú informó de 125 contaxos ayeri –l'actualización contabiliza 1 menos por un duplicáu en díes previos–. Son 21 más que'l miércoles, cuando hebo 104.

Fixéronse 2.792 pruebes de diagnósticu d'infeición activa, polo que la tasa de positividá quedó nun 6,09 por cientu, cuasi un puntu superior que la xornada anterior, cuando s'astitió nun 5,10 por cientu. A 7 díes esti porcentaxe yera enantes de l'actualización del 5,17 por cientu –ayeri xubió al 5,28 por cientu–.

Hai que llamentar la muerte d'un home de 66 años y d'un mozu de 33. Dende qu'entamó l'andanciu acumúlense 1.940 finaos –retiróse 1 de la serie– cola enfermedá causada pol coronavirus SARS-CoV-2.

El númberu d'ingresaos na UCI son 69, 1 más que'l miércoles, mentes que tán ingresaos en planta con confirmación o sospecha de COVID-19 un total de 159 persones, 6 menos.

Na imaxe, Fernández Muñiz en primer planu, con Melania Álvarez García, vocera del Gobiernu y conseyera de Derechos Sociales y Bienestar, y Ana Cárcaba, conseyera de Facienda, detrás. Semeya obra d'Armando Álvarez.

Contador Estadistiques