Selmana de les Lletres Asturianes

El retrasu nel unvíu de la vacuna de Janssen nun apara la campaña de vacunación

|
Vacunación a mayor de 70 años en Castrillón

El retrasu na llegada de les primeres 3.100 dosis de la vacuna de Janssen obliga al SESPA a modificar el plan de vacunación pa estos díes, pero nun apara una campaña que yá permitió que’l 10,9 por cientu de la población a vacunar tenga la pauta completa. Nengún fináu esti martes con COVID-19 nun xornada con 194 contaxos.

Asturies va siguir vacunando estos díes coles dosis de Pfizer/BioNTech y Moderna, ente los ciudadanos de 70 a 79 años, y d’AstraZeneca, a los de 60 a 69 años. Les de Janssen, previstes pa güei, van tener qu’esperar pola decisión de Johnson & Johnson de paralizar temporalmente l’unvíu a Europa de los viales por recomendación del Gobiernu de los Estaos Xuníos tres la detección de 6 casos de trombos ente los 7 millones que recibieren la vacuna, toes muyeres d’ente 18 y 48 años.

Los datos últimos sobre la vacunación asoleyaos pol Ministeriu de Sanidá, a partir de datos de la Conseyería de Salú, que correspuenden al llunes, reflexen que’l 10,9 por cientu de la población diana d’Asturies yá recibió la pauta completa, un total de 98.293 asturianes y asturianos –l'actualización fecha dende Asturies estar tarde aumenta estes cifes a ayeri a un 11,36 por cientu y 102.420–. Ye’l segundu porcentaxe más altu del Estáu, namái superáu por Castilla y Lleón, qu’algama un 11,2 por cientu, cuando la media ye del 7,8 por cientu.

Si miramos la cantidá de persones que recibieron al menos una dosis, n’Asturies asciende a 211.246, un 23,4 por cientu de la población. La media estatal ye del 19,8 por cientu.

Cantidá más alta de casos dende’l 12 de febreru

A falta de la espublización de los datos oficiales de la COVID-19, la Conseyería de Salú informó de la detección ayeri de 194 casos –l'actualización retira 1 de díes anteriores por una duplicidá de positivu que pon el total acumuláu en 48.964–. Son 76 más que los comunicaos pal día anterior y la cantidá más alta rexistrada dende’l 12 de febreru, cuando hebo 222 casos nuevos –tres una revisión, yá qu’esa xornada s’anunciaron 217–.

La tasa de positividá diaria quedó nun 6,82 por cientu tres la realización de 3.651 pruebes de diagnósticu d'infeición activa, cuando la xornada previa foi del 6,10 por cientu con 2.836 tests fechos. A 7 díes esti porcentaxe yera’l llunes del 4,88 por cientu –ayeri xubió al 5,32 por cientu–.

Nun hai que llamentar nenguna muerte na xornada cola enfermedá cuasada pol coronavirus SARS-CoV-2, polo que’l total acumuláu nel andanciu queda en 1.926. La última ocasión na que nun hebo finaos foi’l 29 de marzu.

Hai hospitalizaes 180 persones con confirmación o sospecha de COVID-19, a los qu’hai que sumar otres 69 que tán na UCI. Son 6 y 1 más que’l llunes.

Prórroga en Llangréu

Salú prorrogó otros 14 díes, hasta'l día 27, revisable nuna selmana, el nivel d'alerta 4+ en Llangréu. Ye l'únicu conceyu en zarru perimetral xunto con Mieres.

Pa consultar los indicadores de tolos llugares y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na semeya, una persona mayor de 70 años recibe la so primer dosis ayeri nel pabellón de Castrillón.

Contador Estadistiques