La selmana pasada rexistró una media de 78 contaxos diarios

Ye la primer vegada que se baxa del centenar de positivos dende l'entamu d'ochobre.

A falta de conocer los datos oficiales de la COVID-19, que la Conseyería de Salú nun actualiza dende'l miércoles, nestes xornaes detectáronse 349 casos nuevos: 95 el miércoles, 60 el xueves, 56 el vienres, 57 el sábadu y 81 ayeri. Na selmana última rexistráronse 546 contaxos, pasando de 26.271 a 26.817 –una vegada actualizaos los datos, sumáronse 20 positivos más que ponen el total en 26.837–, una media diaria de 78, cuando l'anterior esta cifra taba en 101.

Sigue confirmándose la tendencia descendente de positivos, anque les autoridaes sanitaries tan pendientes d'un ascensu posible por cuenta la mayor movilidá que se vive nes fiestes navidiegues magar les restricciones, tando anguaño nes cantidaes que se manexaben en setiembre. Dende qu'Asturies.com principió a calcular esti datu la evolución foi la siguiente: 39, 46, 52, 83, 92, 92, 150, 210, 272, 334, 408, 508, 344, 252, 194, 125 y 101 hasta los 78 actuales.

Otra manera, la tasa de positividá a 7 díes asítiase anguaño nun 2,9 por cientu.

22 finaos

Estos díes perdieron la vida cola enfermedá causada pol coronavirus SARS-CoV-2 22 persones: 3 el miércoles, 5 el xueves, 6 el vienres, 5 el sábadu y 3 ayeri. Dende qu'entamó l'andanciu hai que llamentar 1.336 muertes –l'actualización suma dos finaos más non contabilizaos nel día a día–.

229 pacientes tán hospitalizaos con confirmación o sospecha de COVID-19, a los qu'hai que sumar los 65 que tán na UCI. Son 42 y 4 menos que'l martes.