‘Hai una llinia trazada’, de Xune Elipe, lleva’l XXVI Premiu Máximo Fuertes Acevedo d’ensayu

Xune Elipe algama’l so primer gallardón nos Premios Lliterarios. Ye con ‘Hai una llinia trazada. Historia de la música asturiana’, ensayu merecedor del XXVI Premiu Máximo Fuertes Acevedo d’ensayu según el dictame del xuráu aconceyáu esti miércoles.

Ésti apunta que la obra "compendia la historia de la música asturiana nel so contestu históricu y llingüísticu” y afita’l merecimientu del premiu nel "cuidáu y esmeru formal y intelectual presentáu con un rigor máximu, qu’en análisis nun desatiende l’axilidá descriptiva oportuna pa facer del llibru una llectura arriquecedora y prestosa a un mismo tiempu". Amás, les persones que lu conformaron, les filólogues Marta López y María Cueto, la escritora Beatriz Quintana y los autores Jorge Arturo Sierra y José Ángel Gayol –vencedor de la edición pasada por 'El silenciu invisble'–, con Antón García, direutor xeneral de Política Llingüística como presidente, y Juncal García, del serviciu de la direición xeneral, como secretaria, pronostiquen que “va ser una obra de referencia”.

'Hai una llinia trazada' ye un ensayu que ta acompañáu con cuatro CD “onde se repasa'l fechu musical asturianu dende'l Paleolíticu (cola flauta magdaleniense de la cueva de La Güelga, Llanes) hasta les últimísimes tendencies”, apunta Elipe. “Pero nun ye namás una historia musical al usu”, sigue, “sinón que nella interrellaciónase l'aspectu musical cola realidá socio-política de cada momentu, con otres artes, cola cuestión llingüística, con otros movimientos internacionales, etc. Ta fecha, amás, dende una perspectiva mui pensada y especial, dalgo que separta y singulariza esta obra de les publicaes hasta'l momentu sobre'l mesmu tema”.

Amás, el tamién productor adelántanos unes pallabres del entamu de la obra, un llabor de 3 años, que la “espliquen amañosamente”: “El nuestru enfotu ye facer un repasu pelos momentos, movimientos y intérpretes más importantes al traviés de los sieglos, resaltando los datos y fechos que foron cruciales nel devenir de la nuestra música. Y ello dende un puntu de vista non colonial, considerando a la música asturiana como un ente vivu y autónomu, non supeditáu nin dependiente d'otros procesos. Una historia contada dende dientro de la propia música del país, con un enclín claramente pedagóxico-divulgativu y militante nacional, social y culturalmente”.

El María Xosefa Canellada, el próximu

Ésti ye’l tercer de los cinco Premios Lliterarios que se fallen. Enantes, Alberto Vázquez García llevara’l XII Premiu Alfonso Iglesias de cómic gracies al so trabayu ‘El sol na escombrera’, y Alejandro Fernández-Osorio’l XXVI Xuan María Acebal de poesía con ‘Tayu’.

El próximu en conocese va ser el XIII María Xosefa Canellada de lliteratura infantil y xuvenil, con fecha d’aconceyamientu del xuráu pal día 21, quedando llueu pendiente’l XLI Xosefa Xovellanos de novela. Toos tienen una recompensa de 5.000 euros.