José Ángel Gayol algama’l so segundu Máximo Fuertes Acevedo d'ensayu

El XXV Premiu Máximo Fuertes Acevedo d’ensayu ye pa José Ángel Gayol, alcuñu lliterariu qu’emplega’l mierense José Ángel García Fernández, por ‘El silenciu invisible’. Ésti ye’l segundu gallardón que lleva nesta estaya tres ganar nel añu 2015, y el tercer Premiu Lliterariu al merecer nel 2012 el Xuan María Acebal de poesía.

Antón García, direutor xeneral de Política Llingüística, presidió na tarde d’ayeri’l xuráu, que tuvo conformáu por Damián Barreiro, ganador de la edición pasada por ‘Asturploitation’; la profesora y crítica lliteraria Marta López Fernández; y la profesora de la Facultá de Filosofía y Lletres, María Cristina Valdés Rodríguez. Ente les obres presentaes decidiéronse por mayoría por ‘El silenciu invisible’ al reconocer nella “la so fondura intelectual, la capacidá d'análisis de la realidá a partir de les obres pictóriques y l'habilidá pa texer idees y afirmaciones de calter políticu, filosóficu o social, dando voz a lo que nun s'oi y lluz a lo que nun se ve”.

Al abrir la plica, el trabayu presentáu baxo’l nomatu ‘Albert Camus’ resultó ser de Gayol, que lleva una recompensa de 5.000 tres l’aumentu de 2.000 euros na edición d’esti añu. Ésti ye’l segundu Máximo Fuertes Acevedo pal autor nacíu en Mieres nel 1977, yá que nel 2015 fíxose col premiu gracies a ‘Vértigu. L’atracción del abismu na sociedá contemporánea’.

Críticu lliterariu y persona d’amplia formación y distintes inquietúes lliteraries, sociales y polítiques, tamién tien ente los sos reconocimientu el XVIII Premiu Xuan María Acebal de poesía, correspondiente al 2012, por ‘El llibru de les coses misterioses’.

Trés restantes

Ésti ye'l segundu de los cinco Premios Lliterarios de la Conseyería d'Educación y Cultura que se falla tres el XI Alfonso Iglesias de cómic, que llevó Ruma Barbero por 'Seltegu'. Queden por conocer los ganadores del XL Xosefa Xovellanos de novela, el XXV Xuan María Acebal de poesía y XII María Xosefa Canellada de lliteratura infantil y xuvenil.

Semeya obra d'Astur baxo llicencia CC BY-SA 4.0.