El CD Lealtad viaxa a Las Rozas pa garrar l'últimu tren a Segunda B

Los maliayos van xugar a partíu únicu col Alcoyano pa dar el saltu de categoría.

La decisión de la Real Federación Española de Fútbol de dexar fuera de la repesca a Portugalete, pendiente de xugar la so eliminatoria col Sestao River, aplazada por un positivu d'una pareya d'un xugador, acelera'l final de la temporada pal CD Lealtad. Los maliayos, tres el sortéu celebráu'l miércoles, van xugar mañana a les 22 hores en Las Rozas col Alcoyano, mentes que'l domingu el CD Marino canariu y el Linares van lluchar pola segunda plaza llibre en Segunda División B.

Los cuatro son los campeones de grupu que nun algamaron l'ascensu nes eliminatories territoriales, llista a la que se podía sumar el Portugalete, pero que queda fuera por una decisión federativa qu'indigna al club vascu al nun tener segunda oportunidá como'l restu. Asina, el ganador de cada partíu, que sí va tener prórroga y penaltis con igualada, va ser equipu de la categoría de bronce na temporada próxima.

El rival del Lealtad va ser l'Alcoyano, equipu con pasáu en Primera y habitual de la Segunda B, ente los que destaca l'ex del Elche José Juan. Un duelu complicáu pa los de Villaviciosa que, tres dos lligues regulares inmaculaes busca dar un golpe enriba de la mesa nuna eliminatoria pol ascensu depués de los disgustos col Getafe B y el Villarrobledo del añu pasáu, y la d'ésti col Caudal.

Semeya propiedá del Club Deportivo Lealtad de Villaviciosa.