El CD Covadonga ye'l quintu equipu asturianu de Segunda División B

|
El CD Covadonga ye'l quintu equipu asturianu de Segunda División B

El club uvieín fai historia col ascensu a la categoría de bronce tres superar al Caudal (2-0). El CD Lealtad va competir na repesca por una de les dos places llibres.

El CD Covadonga vivió ayeri el día más importante de los sos 41 años d'historia. Los del Juan Antonio Álvarez Rabanal algamaron el saltu al tercer escalón del fútbol estatal nel so tercer intentu, l'últimu la temporada pasada contra'l Bergantiños gallegu.

El formatu improvisáu pola Real Federación Española de Fútbol (RFEF) aseguraba una plaza d'ascensu por grupu, cruciando a los cuatro meyores n'eliminatories direutes a puerta zarrada nel avilesín Suárez Puerta, con ventaya pal q'ocupara un puestu más altu na clasificación al nun haber nin prórroga nin penalties, valiendo-y l'empate. El Cova, dende la tercer plaza, nun especuló na final col Caudal, cuartu, como tampoco fixo en semifinales col Llanera (1-3), segundu.

Dieron primero los de Fermín Álvarez, nuna gran xugada qu'Edu Font finalizó con un palu, dando-y continuidá Diego García y finalizándola Míchel Secades de llombu a portería nun guapu xestu téunicu en posible posición irregular. Corría'l minutu 27 del partíu y el Caudal afrontaba'l restu del choque sabiendo la necesidá d'anotar dos goles p'algamar l'ascensu.

Pero enfrente los mierenses toparon a un espectacular Aitor Rodríguez. El meta azul sacó una mano espectacular nun remate de cabeza de Mendi qu'entraba a gol y foi protagonista d'otres munches intervenciones decisives.

El Caudal intentólo per tolos medios na segunda metá, col Cova cómodu a la contra. Pero nun sería hasta'l final, nel añadíu, cuando sentenciaría'l partíu gracies a un serviciu de Font a Jaime pa prauticamente marcar a puerta vacía, llevando la llocura a tolos xugadores, cuerpu téunicu y direutiva uvieína presente nel Suárez Puerta, asegurando asina l'ascensu a Segunda B, categoría onde tamién van competir l'UP Langreo, el Club Marino y los dos filiales de Sporting y Uviéu.

Segunda oportunidá

El CD Lealtad, como campeón de grupu, va tener opción a competir por una de les dos places llibres pa completar los 100 equipos en Segunda B. De momento, a la espera de la celebración del Portugalete-Sestao River pol positivu d'una pareya d'un xugador, hai cuatro equipos aspirantes: el Marino canariu, el Linares, l'Alcoyano y el propiu equipu maliayu.

El Portugalete, como campeón vascu, tendría derechu a participar na repesca, con formatu entovía desconocíu, nel casu de cayer nesta eliminatoria.

Na imaxe, los xugadores y suplentes del Cova celebren el gol del Jaime nel tiempu añadíu. Semeya propiedá del Club Deportivo Covadonga.

Contador Estadistiques