El XLI Día de les Lletres Asturianes tien fecha nueva: el 2 d’ochobre
- L’ALLA y Política Llinguística alcuerden treslladar el Día y la Selmana de les Lletres Asturianes a la seronda
- Sánchez Vicente: “Los que quieran escribir n’asturianu deberíen saber casi de memoria los nuesos clásicos”
- Los concursos escolares pa la Selmana de la Lletres Asturianes tienen plazu nuevu pa la entrega de los trabayos
- La FSA convoca'l so concursu con motivu de la Selmana de les Lletres
|
6 Mayu, 2020 por Pablo R. Guardado
- Inicie sesión o rexístrese pa espublizar comentarios
Estos díes teníemos que tar celebrando la XLI Selmana de les Lletres Asturianes cola vista puesta nel vienres, Día de les Lletres Asturianes, que finalmente pasará al 2 d’ochobre. La crisis sanitaria actual por cuenta de la pandemia de COVID 19 obligó en marzu a l’ALLA y a la Conseyería de Cultura, Política Llingüística y Turismu a treslladar a la seronda la gran fiesta de la nuesa lliteratura.
La Selmana de les Lletres Asturianes allargaráse, “siempres que se dean les condiciones sanitaries y sociales”, del 28 de setiembre al 2 d’ochobre. Nesti día tendrá llugar el Día de les Lletres Asturianes, xornada na que l’Academia de la Llingua Asturiana (ALLA) entama la so xunta estraordinaria.
Xuan Xosé Sánchez Vicente recibirá nesti actu, abiertu al públicu con sede tradicional nel uvieín Teatru Campoamor, el II Premiu Nacional de Lliteratura Asturiana. L’escritor aseguraba’l mes pasáu nuna entrevista n’Asturies.com tar “fastidiáu” pol retrasu obligáu pola crisis sanitaria y que “yá tenía preparáu’l discursu”.
Si nun hai novedá, podrá lleelo’l 2 d’ochobre nuna cita na que tampoco faltará la reivindicación na cai de la oficialidá del asturianu y el gallego-asturiano de la Xunta pola Defensa de la Llingua Asturiana (XDLA) nes condiciones que puedan ser asumibles nesi tiempu. L'actu de l’ALLA será "carauterístiques estremaes a les avezaes, axustáu al contestu preventivu d’anguaño".
Dedicada a Tuxa
La Direición Xeneral de Política Llingüística entama al empar la Selmana de les Lletres Asturianes, que nesta ocasión ta dedicada l'autora maliaya María Teresa Villaverde ‘Tuxa’ (1882-1934). Asina va emplegar el lema ‘Tuxa, sentimientu y tradición’ y va recuperar nuna espublización la so obra llocalizada, amás de producir un videu sobre la so persona y l’entornu cultural y social nel que trabayó.
La llectura institucional na Xunta Xeneral y dellos actos pa escolares y la ciudadanía, como’l Día del Llibru Asturianu, van desendolcase nes xornaes que celebren añalmente’l pasáu, presente y futuru de la lliteratura asturiana.
Efrén d'Andrés
