Día del Llibru Asturianu

La FSA convoca'l so concursu con motivu de la Selmana de les Lletres

|
La FSA convoca'l so concursu con motivu de la Selmana de les Lletres

El plazu pa participar fina'l 25 de setiembre.

La XLI Selmana de les Lletres Asturianes va celebrase del 28 de setiembre al 2 d'ochobre tres la decisión en marzu de treslladar la gran fiesta de la nuesa lliteratura de les sos feches habituales, los primeros díes de mayu, a la seronda por cuenta de la pandemia de COVID-19 que llevaba a les autoridaes a confinar a tola población. Dada la so cercanía, la Federación Socialista Asturiana (FSA) convocó ayeri el so III Concursu Selmana de les Lletres Asturianes na FSA-PSOE de Microrrellatos en Twitter.

Tolos ciudadanos pueden participar nél espublizando un tweet de temática llibre "col oxetivu de llanzar un mensaxe nes redes sociales al rodiu de la celebración de la cuarentena primer edición de la Selmana de les Lletres Asturianes". La cantidá máxima son 280 carauteres, incluyida la etiqueta #SelmanaLletresFSA, y l'usuariu ha de siguir tamién la cuenta en Twitter de la FSA.

A la medianueche del día 25 va zarrase'l plazu de participación, con una llende de dos tweets por persona. Un xuráu compuestu por Antón García, direutor xeneral de Política Llingüística; Esther Prieto, poeta y copropietaria d'Ediciones Trabe; María Esther García López, presidenta de l'Asociación d'Escritores d’Asturies; Inaciu Galán, escritor y periodista; y María Luz Pontón, secretaria d’ Educación, Universidá y Normalización Llingüística de la FSA-PSOE, va seleicionar un total 25, que van recibir un diploma y un detalle.

Mentes, los autores de los 3 meyores testos van llevar, amás del diploma, un llote de llibros. Na edición anterior la ganadora foi Laura Iglesias, con Iván de Cazarón como segundu clasificáu y César G. Herrerías en tercer posición.

Na semeya, actu d'entrega de los premios de la segunda edición del concursu.

Contador Estadistiques