El Gobiernu asturianu marca un perfil propiu na crisis sanitaria pol coronavirus

Los cuasi 40 díes pasaos dende que se rexistrara’l primer positivu por COVID-19 n’Asturies tán amosando un cambiu nel Executivu tres llegada d’Adrián Barbón a la presidencia. El Gobiernu paez que ta marcando un perfil propiu na crisis sanitaria, como se pue ver coles decisiones tomaes sobre la non paralización de la industria o los posicionamientos del llavianés sobre l'andanciu.

La claridá informativa foi l’apueste fechu pol Executivu dende un primer momentu d’esta situación. Barbón, siempre mui activu en redes sociales, interactuando con abondos usuarios, salió a los medios dende’l primer momentu al traviés de comunicaos audiovisuales pa dar tolos detalles sobre la evolución del andanciu de COVID-19.

Estes intervenciones, a les qu’hai que sumar les sos respuestes en redes sociales y les decisiones tomaes pol so equipu de gobiernu, amuesen un cambiu nel Executivu asturianu, que per primer vegada tres décades de siguidismu ta marcando un perfil propiu y qu'en dellos casos matiza o supera les indicaciones de les autoridaes estatales.

L’últimu exemplu foi ayeri, tres una mensaxe llanzáu tres la videoconferencia de presidentes autonómicos con Pedro Sánchez, al que-y reclamó una meyor coordinación de la información que se-y da a pymes y autónomos o la presencia de les comunidaes autónomes nun hipotéticu pautu d'estáu pa da-y respuesta a la crisis del coronavirus.

“El plantegamientu que-y fiximos les comunidaes autonómes al Gobiernu d’España ye que, dao que va tener qu’editar los Pautos de la Moncloa, tenga en cuenta que cuando se fixeron nos años 70 nun esistíen les autonomíes como tal. Güei ye fundamental que nos pautos que falen de la reconstrucción del país teamos también las comunidades autónomas”, apuntó.

Tamién señaló que “se tien que clarificar a les comunidades autónomes cómo van quedar les llendes del techu de gastu, el nivel d’endeudamientu y l’oxetivu de déficit, porque ye la forma de saber los recursos colos que contamos nesta batalla”, añadiendo que-y paez “fundamental que les autonomíes podamos regular los nuesos presupuestos p’adaptalos, primero, al oxetivu principal, que ye la salú pública, vencer al coronavirus; y en segundu llugar, los fondos que tendremos p’afrontar la reconstrucción económica, otra de les prioridaes".

Por último, Barbón posicionóse con un tonu especialmente críticu sobre’l papel qu’ha de xugar la XE nesta pandemia, "que se pue convertir nuna crisis económica mui fonda si Europa nun respuende". “El mio plantegamientu ye, dígolo abiertamente, de qué nos sirve la Xunión Europea si, nesti casu, que ye cuando más la necesitamos, nun actúa”, sentenció Barbón.

Unes declaraciones que, sumaes a otres previes como nes que confirmó que “si tuviera capacidá llegal, yá pesllara Asturies”, feches enantes de la declaración del estáu del alarma, pidiendo tamién “cuarentena de 14 díes” a los qu’aporten al país, o la decisión de caltener activa la industria asturiana mientres esta segunda prórroga na que namái trabayen los sectores esenciales aprovechando la manga ancha que dio’l Gobiernu estatal, lo que provocó inclusive la protesta del Gobiernu vascu d’EAJ-PNV a Madrid percibiendo un tratu de favor a Asturies que nun yera tal, reflexen la presencia d’un lideralgu inesistente hasta la fecha nel país.

Datos pa la esperanza

Les cifres de COVID-19 d’esta fin de selmana dan pie a la esperanza, nuna tendencia de baxada de la curva. El númberu de positivos foi ayeri’l más baxu dende la centralización de los datos por parte del Gobiernu estatal el 16 de marzu: 41.

El total nestos momentos ye de 1.641 –los datos últimos son de les 20 hores d’ayeri– tres 16.631 muestres pa determinación de la COVID-19 por PCR, a los que se van sumar agora los test rápidos unviaos por Madrid. Na UCI tán ingresaes 76 persones, 7 menos que’l sábadu, y en planta, 364.

Otra manera, hai que llamentar la muerte de 16 persones, 6 ayeri, 4 el sábadu y otros 6 el vienres. Dende l’entamu del andanciu finaron n’Asturies 86 afeutaos pola enfermedá causada pol coronavirus SARS-CoV-2.

Na semeya, Barbón ayeri na so intervención tres la videoconferencia de presidentes autonómicos con Sánchez.